Manifestimi tradicional “Kandilat e Bajramit”, i cili organizohet nga shoqata kulturore “Vizion M” në mbështetje të Shkupit, edhe këtë vit ndriçoi qytetin, si dhe gëzoi fëmijët e shumtë të cilët ndoqën dhe morën pjesë në një sërë aktivitetesh të këtij manifestimi.
Tradicionalisht, “Treni i Bajramit” mbledh në një vend shumë fëmijë duke i shëtitur nëpër rrugët e Shkupit me këngë dhe daulle. Përfaqësuesi nga “Vizion M”, Erduan Dauti tha se ky aktivitet më është bërë i pandashëm për shumë fëmijë, dhe se të njëjtit mezi presin të jenë pjesë e shëtitjes për Bajram.
Ai tha se qëllimi i manifestimit është që të sjellë gëzim tek të vegjlit. Ai bëri të ditur se manifestimi ka filluar që nga viti 2005.
“Programi Kandilat e Bajramit është program i zakonshëm, treni i Bajramit me fëmijët i cili vazhdon nëpër rrugët e Çairit ku destinacionin e fundit e ka xhaminë Murat Pashë”, tha Dauti.
Edhe këtë vit projekti “Kandilat e Bajramit” është shoqëruar me 500 pako ushqimore për fëmijët të cilët kanë qenë ndjekës të programit në fjalë.
“Pakot janë pako ushqimore nga donatorët tradicion që e përkrahin projektin që edhe këtë vit duan të mbesin anonim. Këtë vit kemi rreth 500 pako ku shpërndahen për fëmijët në përgjithësi që janë në program”, deklaroi Ismail Berisha, Kryetari i “Vizion M”. /tesheshi.com/
Këtë vit, motoja e manifestimit ishte “Ejani të përcjellim mikun e mirë Ramazanin – Ejani të presim Bajramin”, ndërsa ndërkohë, në vendin ku përfundoi marshuta e “Trenit të Bajramit”, para xhamisë Murat Pasha, vijuan aktivitetet tjera në kuadër të këtij manifestimi tradicional.
Organizatorët kishin përgatitur ekspozitën e titulluar “Ekspozita Stringëll (bizhuteri) dhe art”, ndërsa nuk mungoi edhe koncerti për fëmijë “Fidanët e Bajramit”, ku u recituan poezi dhe u performuan valle tradicionale nga të rinjtë. /tesheshi.com/
