Qeveria maqedonase e Zoran Zaev e mbajti fjalën e dhënë homologut grek Alexis Tsipras. Me vendim qeveritar, aeroportit kryesor të vendit, atij në Shkup, iu hoq emri “Aleksandri i Madh” duke u quajtur “Aeroporti Ndërkombëtar i Shkupit”, ndërsa autostrada e Korridorit 10 drejt Selanikut, u quajt “Miqësia”.
“Sollëm vendim që autostrada që na lidh nga kufiri verior me atë jugorë ta riemërojmë si ‘Autostrada Miqësia’ por gjithashtu sollëm vendim që emri i aeroportit ndërkombëtar të quhet ‘Aeroporti Ndërkombëtar Shkupi’’’, deklaroi Zoran Zaev.
Ky i fundit, për herë të parë tha se qeveria maqedonase është e gatshme që të pranojë emër me përcaktime gjeografike duke mos bërë të ditur mbiemra konkretë që do i shtoheshin termit “Maqedonia”. Ai tha se është e rëndësishme që të vazhdojnë bisedimet me Athinën zyrtare, gjithmonë nën mbikëqyrjen e ndërkombëtarëve, që sa më shpejt të arrihet deri te zgjidhja. Zaev tha se publikimi i detajeve të marrëveshjeve nuk do e ndihmonte procesin, përkundrazi do e ngadalësonte gjetjen e zgjidhjes.
Nga ana tjetër, Ministria e Punëve të Jashtme të Greqisë përshëndeti këtë vendimin e qeverisë së Maqedonisë që t’i riemëtrojë autostradën dhe aeroportin. Sipas Athinës zyrtare, kjo do të thotë hapje të një kapitulli të ri në marrëdhëniet mes dy vendeve dhe dy popujve.
“E përshëndesim vendimin e sotëm të Qeverisë së ish-Jugosllavisë që Republika e Maqedonisë ta riemërojë aeroportin në Shkup në ‘Aeroporti ndërkombëtar i Shkupit’, si dhe autostradën që lidh Shkupin me kufirin grek në ‘Autostrada e miqësisë’. Vendimi i sotëm është hap pozitiv për kthesë të asaj që është bërë në dekadën e kaluar dhe kishte prishur marrëdhëniet mes dy vendeve. Ky është zhvillim i rëndësishëm në drejtim me menaxhimin me irredentizmin dhe shpresojmë se do të thotë hapje të kapitullit të ri në marrëdhëniet mes dy vendeve dhe dy popujve”, kumtojnë nga MPJ greke.
Aeroporti në Shkup “ Aleksandri i Madh” për herë të fundit ishte emëruar më 27 dhjetor të vitit 2006, me vendim të qeverisë, kur në krye të saj ishte Nikolla Gruevski. /tesheshi.com/
