Zëvendëskryeministri Fatmir Besimi deklaroi se duhet që edhe rasti i vrasjeve në liqenin Smilkova të përfshihen në punën e prokurorit special. Opozita pretendon se ka biseda të përgjuara telefonike për këtë rast ndaj edhe ato duhet të jenë objekt hetimi të mëtejshëm.
“Ajo që prokurori special publik, do ta ketë si punë është vetë procesi i përgjimit dhe përmbajtja e materialeve. Siç dihet në opinion, në bisedimet ka material edhe për Liqenin e Smilkovës, që do të thotë se edhe ato duhet të jenë objekt i hetimit,” ka deklaruar zv/kryeministri Fatmir Besimi për gazetën Vest.
Përgjimet e pretenduara nga lideri i opozitës maqedonase, Zoran Zaev për rastin e liqenit të Smilkovës në fakt, nuk janë publikuar asnjëherë.
Vrasja e pesëfishtë pranë liqenit, tre vjet më parë, është shoqëruar me paqartësi dhe publiku nuk di jo vetëm motivet e vërteta por edhe nëse janë ndëshkuar vrasësit e vërtetë. /tesheshi.com/
