Fabula “hip se të vrava, zbrit se të vrava”, po luhet këto ditë në Shkup, pas nisjes së rikonstruksionit të një prej rrugëve kryesore e simbol të Çairit, lagjes së dominuar nga shqiptarët, ai që përshkron Bit Pazarin e Çarshinë e Vjetër.
Ishte paralajmëruar që nga 2005-sa, por tani ka nisur të bëhet realitet. Më të dëshpëruarit janë shitësit e luleve, ata të cilët sheshin produktin e tyre të natyrës përskaj rrugës. Të detyruar të largohen prej andej, ata nuk e pranojnë këtë fakt e thonë se me pengimin e punës po u ndërpritet kafshata e bukës e 400 familjeve. Njëri nga tregtarët kërkon nga autoritetet kompetente që t’i marrin në konsideratë kërkesat e tyre.
“Ne kemi vendosur që protestat t’i vazhdojmë deri sa të bëhet zgjidhja e problemit. Ne nuk kërkojmë nga ata që të na bëjnë diçka të pamundshme, po kërkojmë zgjidhje, tha një tregtar.
“Të gjithë jemi të varur nga kjo punë që bëjmë. Ne jemi një familje prej shtatë anëtarësh. Të gjithë prej këtij vendi sigurojmë ushqimin. Ne nuk duam të bëjmë probleme, por kërkojmë një zgjidhje, tha një tregtar tjetër.
Nga Komuna e Çairit theksojnë se nuk do të heqin dorë nga synimet për lëvizjen e sigurt të qytetarëve, si për këmbësorët ashtu edhe të shitësve. Edhe nga Komuna Shkupit thonë se nuk do të heqin dorë nga synimet për lirimin e trotuareve nga vendosjet e paligjshme përgjatë bulevardeve.
Ndërkohë, punimet për rikonstruimin e bulevardit përgjatë Bit Pazarit përfshijnë ndërtim i një taksi-stacioni, rrugë për këmbësorë, hapësirë e gjelbër dhe stacion ku do të mund të ndalen autobusët që do të bartin turistë për në Çarshinë e Vjetër të Shkupit.
M.Hasani – /tesheshi.com/
