Opinioni në Maqedoni është tronditur nga rasti i abortimit të një vajze, kontigjent i qendrës së strehimirë të fëmijëve “25 maji” në Shkup.
Ministria e Punës dhe Politikës Sociale pas inspektimit ka konstatuar një sërë shkeljesh ligjore nga ana e kësaj qendre, e ndërkohë po përgatitet padi penale dhe kundërvajtëse ndaj disa personave përgjegjës.
“Inspektimi social konstatoi disa shkelje të Ligjit për mbrojtje sociale, Ligjit për familje, nën-ligjeve dhe akteve të tjera që kanë të bëjnë me procedurën për marrjen e personave nën kujdestari prindërore, strehimin e fëmijëve në Qendër dhe strehimin e fëmijëve pa përkujdes prindëror në familje”, thuhet nga ministria.
Vajza e përdhunuar, një rome 13-vjeçare, ishte ndarë nga prindërit në moshën 5-vjeçare dhe u dërgua në strehimoren për fëmijë “25 Maji”, kurse familja është strehuar në qendrën për strehim “Çiçino”.
Por ky nuk është i pari rast që ajo përdhunohet. Vitin e kaluar, prindi i saj ka paraqitur në polici rastin se vajza e tij ka qenë e përdhunuar në Strugë, e gjithçka çka ka bërë policia është evidentimi i rastit.
Babai i vajzës thotë se për ta vërtetuar rastin i janë dashur 500 euro.
“Erdhi polica, më mori deklaratë prej meje dhe prej të voglës. Kjo ka ndodhur në 2016-n.
Nga qendra për punë sociale më thanë: Shefqet, duhesh ta dërgosh në Mjekësi Ligjore, ta shohësh a është me të vërtetë e përdhunuar. Kur e dërgova tek Mjekësia Ligjore, ata më kërkuan 500 euro”, u shpreh prindi i vajzës, Shefqet Ibrahimi.
Më tej, ai dyshon te një bashkëstrehas i kësaj qendre, me çka policia e ka marrë në pyetje të dyshuarin dhe në mungesë të provave i dyshuari është lëshuar.
Djali i dyshuar thotë se me vajzën kanë qenë në qytetin e Gostivarit duke kërkuar lëmoshë, dhe në mbrëmje ajo është kthyer në strehimore duke qenë të shoqëruar me persona të tjerë që po ashtu janë lypsarë.
Ministria e Punëve të Brendshme si dhe Prokuroria Publike kanë qenë të njoftuara 9 herë me radhë nga ana e punonjësve të kësaj strehimoreje për dyshime lidhur me të miturën rome. Nga policia thanë se për të gjitha rastet kanë ndërmarrë veprime në përputhje me kompetencat e tyre dhe se për të gjithë rastet e kanë njoftuar Prokurorinë Publike dhe se po punohet në zbardhjen e rastit.
M.Hasani – /tesheshi.com/
