Gjuha e urrejtjes në mediat proqeveritare maqedonase, ka arrituar në atë nivel për të rezultuar me masën e parë serioze të aplikuar kundër saj, nga një organizatë jo pa prestigj.
Eshtë misioni i OSBE-së në Shkup që ka njoftuar se, ndërpret komunikimin me gazetarin kontravers Milenko Nedelkovski, i njohur në opinion për qëndrime nacionaliste dhe raciste, si dhe më të gjitha mediat të cilat transmetojnë qëndrimet e tij.
Gota u mbush, me deklaratën e Nedelkovskit, cili publikisht deklaroi se një numër i madh i qytetarëve, shumica gazetarë dhe politikanë, duhet varrosur thellë në tokë dhe të mbulohen me pllakë të trashë betoni, që t’mos kenë fare ndikim mbi situatën aktuale politike.
Nedelkovski, njihet edhe për ofendimet publike që u bën shqiptarëve, ndërsa target i tij janë të gjithë gazetarët dhe opinionistët me qasje kritike ndaj qeverisë, të cilët i ka shpallur tradhëtarë.
Në reagimin e Misionit të OSBE-së, thuhet se kjo deklaratë paraqet shkelje të vijës së kuqe të fjalorit të urrejtjes, e cila nuk mund të tolerohet. /tesheshi.com/
