Nga Bekim Laci
Diskutimet e mbrëmshme në Shkup të përfaqësuesve politikë të vendit, në prani të atyre të BE-së dhe OSBE-së, nuk kanë dhënë rezultat konkret për reformat në legjislacionin zgjedhor.
Kjo u bë e ditur nga vetë ekipet negociuese të cilat mbrëmë vonë u larguan nga takimi pa dhënë detaje.
Siç mëshet jo-zyrtarisht, temat për të cilat informuam një ditë më parë kanë qenë ato për të cilat është diskutuar, respektivisht pastrimi i listës së zgjedhësve dhe votimi për deputetë nga diaspora.
Ndërmjetësuesi në bisedime, eksperti belg Peter Van Hojt, ishte shumë i shkurtër në prononcim kur tha se është optimist, ndërsa njoftoi për një takim të ri i cili do të mbahet sot.
Burime partiake njoftojnë se gjatë bisedimeve është propozuar që të përpilohet një listë e re e votuesve me qëllim që votuesit të cilët dëshirojnë të votojnë në zgjedhjet e prillit të regjistroheni disa muaj para zgjedhjeve të planifikuara.
Lidhur me këtë, polemikat kanë qenë në drejtim se vallë ky regjistrim duhet të jetë i detyrueshëm apo vullnetar.
Në takimet e ardhshmë pritet që këto çështje të vihen në letër, njoftojnë të njëjtat burime.
Në takim, siç marim vesh, është shtruar edhe propozimi i anulimit të plotë të votimit për deputetët e diasporës, propozim ky i BDI-së, si dhe propozimi i LSDM-së për census gjatë votimit, për çka secila palë ka parashtruar argumentet e veta, ndërsa sot pritet të hapet tema në lidhje me përbërjen e KSHZ-së, në mënyrë që funksionimi i tij të jetë në përputhje me kërkesat e BE-së, e cila nga Maqedonia kërkon që komisioni të jetë i përbërë nga profesionistë, që të shmanget kështu ndikimi partiak.
Grupi punues që meret me reformat në legjislacionin zgjedhor është i përbërë nga: Nikolla Todorov, Nikola Popovski nga VMRO-DPMNE, Radmilla Shekerinska, Damian Mançevski dhe Cvetanka Ivanova nga LSDM-së; përfaqësues të BDI-së janë Artan Grubi, Musa Xhaferi dhe Fatmir Besimi, dhe të PDSH-së Imer Aliu, Luan Tresi dhe Bekim Fazliu, ndërsa ka dalë si nevojë e marrëveshjes politike të 2 qershorit për të implementuar rekomandimet e BE-së për reforma në fusha të caktuara të cilat shihen si më problematike: Gjyqsori, Avokati i Popullit, Shërbimet e Sigurisë, Mediat dhe Zgjedhjet. /tesheshi.com/
