Nga Mensur Krasniqi
Bashkimi Demokratik për Integrim i ka dhënë fund protestave kundër ngritjes së kryqit 50 metrosh në komunën Butel të Shkupit. Natën vonë, ajo ka mbledhur raqet, pra tendat e ngritura, dhe është larguar prej aty.
Pas kundërprotestave të një grupi maqedonasish ku u tentua të thyhet kordoni policor për t’u përballur me protestuesit shqiptarë, zyrtarët e lartë të BDI-së thanë se duke dashur të evitojnë çfarëdo rreziku, meqë këtë fundjavë është dhe festa fetare e ortodoksëve, ajo e “Ujit të Bekuar”, kanë vendosur të ndërpresin protestën e tyre, me ç’rast edhe i kanë çmontuar tendat para gurthemelit ku planifikohet ndërtimi i kryqit.
Por n/kryetari i Bashkimit Demokratik për Integrim, Izet Mexhiti, në konferencën për gazetarë të premten vonë, tha se tërheqja e tyre nuk është dorëzim por një lloj marrëveshje ndërinstitucionale e ndihmuar edhe nga ndërmjetësues ndërkombëtarë. Por këtë të fundit Mexhiti nuk e bëri me dije, pra se ç’lloj marrëveshje është arritur, dhe se në fund do ngrihet apo jo kryqi i Butelit, por shtoi që është arritur qëllimi i protestës.
“Ju falënderojmë që i’u përgjigjët thirrjes sonë, u ballafaquam me situate të vështira. Ishim bashkë deri në këto momente, por ky mund i joni nuk ishte i kotë, qëllimi u arrit. Megjithatë për detajet e marrëveshjes do ju informojmë nesër nëpërmjet mediave”, tha numri dy i BDI-së dhe njëherësh kreu i komunës së Çairit, aty ku dhe është ndërtuar një shqipojnë, për inat të së cilës u aludua se do ngrihej kryqi.
Ndërsa kryetari i degës së BDI-së në komunën e Çairit, Bekir Asani, ka shkruar një status në FB që lë të nënkuptuar se vërtet është arritur diçka, por pa e specifikuar se çfarë.
“Betejë pas beteje ne po ia dalim, duke falenderuar çdonjërin prej jush, që së bashku si gjithmonë ndaluam aventurat e rrezikshme të disa çunakeve. Nga 2006 e deri sot, se bashku u kemi bë ballë të gjitha sfidave, duke shpresuar se kësaj radhe janë mbushur mend”, ka shkruar Bekir Asani.
Duke u mbështetur në deklaratat e Mexhitit dhe Asanit, tani për tani nuk mund të konkludohet nëse kjo marrëveshje do të thotë saktësisht që kryqi i planifikuar nuk do të ndërtohet në vendin e caktuar nga komuna e Butelit. Megjithatë, orët në vijim do të saktësojnë këtë. /tesheshi.com/
