Javën e kaluar, alpinistët në Alpet zvicerane gjetën një grumbull mbetjesh njerëzore, ndërsa një udhërrëfyes malor gjeti rrënojat e një avioni të rrëzuar.
Këto mbetje janë rreth 50 vjeçare. Pak më parë, në fund të korrikut, u gjetën eshtrat njerëzore të një personi që besohet se ka vdekur në vitet 1980. Të gjitha janë bërë të dukshme sepse akullnajat në Alpe po shkrihen dhe janë vetëm disa nga objektet e reja që po zbulohen falë ngrohjes globale, shkruan Business Insider.
Të mërkurën, më 3 gusht, Augusta nga Franca gjeti pjesë të një skeleti në akullnajën Chessjen në kantonin jugor të Valais në Zvicër. Dario Andenmatten, menaxheri i kasolles malore nga e cila nisin ngjitjen e tyre shumë alpinistë, tha për The Guardian se ai mendon se personi vdiq në vitet ’70 ose ’80 të shekullit të kaluar.
Në fund të korrikut, dy alpinistë gjetën një trup në akullnajën Stockji, pranë vendpushimit të skive. Njëri prej tyre, Luc Lechanoine, i tha gazetës zvicerane Blick se mbetjet ishin të mumifikuara dhe të dëmtuara pak, dhe se personi kishte veshur veshje të stilit të viteve ’80.
Policia po punon ende për të identifikuar të dy grupet e mbetjeve, sipas The Guardian.
Një ditë pas skeleteve nga akullnaja Chessjen, më 4 gusht, një udhërrëfyes malor gjeti mbetjet e një avioni në akullnajën Aletsch, njoftuan autoritetet lokale. Policia njoftoi se hetimi përcaktoi se ato ishin pjesë e avionit Piper Cherokee që u rrëzua në akullnajë më 30 qershor 1968.
“Në momentin e aksidentit, më shumë se 50 vjet më parë, mjetet teknike për nxjerrjen e rrënojave të avionit në zonat e vështira për t’u aksesuar ishin të kufizuara. Për shkak të shkrirjes së akullnajave, sidomos gjatë verës, është e mundur që nga akulli të dalin gjëra të tjera ose pjesë të rrënojave”, tha policia.
Një numër në rritje i kërkimeve sugjeron se ndërsa bota ngrohet për shkak të ndryshimeve klimatike, shumë akullnajat alpine dhe akullnajat e tjera në mbarë botën po shkrihen dhe po tërhiqen. Kjo është arsyeja pse gjetje të tilla nuk janë të rralla.
Për dekadën e fundit, Komanda e Përbashkët e të Burgosurve të Luftës dhe të Zhdukurve në Luftë me bazë në Hawaii ka punuar për të gjetur eshtrat e 52 pjesëtarëve të shërbimit që vdiqën kur avioni i tyre transportues ushtarak u rrëzua në një mal në Alaskë në 1952.
“Ndërsa akullnaja shkrihet dhe lëviz, më shumë material del në sipërfaqe,” tha Gregory Berg, një antropolog mjeko-ligjor, në një konferencë shtypi të vitit 2013. Berg drejtoi një ekip të ngarkuar me ekzaminimin e mbeturinave që “dolën” nga shkrirja e akullnajave.
Kohët e fundit, në Mongolinë perëndimore dhe Norvegji, shkrirja e akullit ka zbuluar objekte të brishta, të ngrira më parë. Midis tyre ka mjete të lashta, litarë, shtiza dhe shigjeta, tha William Taylor, një arkeolog në Universitetin e Kolorados Boulder. Taylor shpjegoi se shkrirja e akujve i kufizon shkencëtarët në një dritare të ngushtë kohore për të siguruar këto objekte përpara se të dëmtohen ose prishen nga moti dhe ekspozimi ndaj elementeve. /tesheshi.com/
