Nga Mensur Krasniqi
Shkrimtari i njohur maqedonas, njëherit edhe aktivist i protestave të sektorit civil “Revolucioni shumëngjyrësh”, Petar Andonovski në intervistën për Radio Evropa e Lirë, ka shprehur shqetësimin e tij se asnjëherë nuk ka mundur ta imagjinoj se Maqedonia do të arrijë në pikën ku artistët, në vend që të luftojnë për liri, do të bëjnë thirrje për përdorimin e plumbave të gomës kundrejt popullit të tyre, siç është rasti ndërmjet policisë dhe protestuesve të pakënaqur nga pushteti aktual.
Ai madje nuk ka hezituar që gjendjen momentale në Maqedoni, ta krahasojë me gjendjen e Serbisë gjatë regjimit të Millosheviqit.
“Drejtësi patjetër të ketë. Gjithashtu edhe përgjegjësi penale. Për fat të keq, Maqedonia për momentin është kthyer 30 vjet prapa. Kur para 10 viteve lexoja esetë e Dubravka Ugresiç që flisnin për situatën në Kroaci në vitet e 90-ta në kohën e Tugjmanit, dhe Serbisë në kohën e Millosheviqit, kurrë nuk kam imagjinuar se Maqedonia do të vijë në pikën ku do të kemi gazetarë që bëjnë lista të tradhtarëve”, ka deklaruar shkrimtari Petar Andonovski, për Radio Evropa e Lirë.
Sipas Andonovskit, realiteti i hidhur i qytetarëve në Maqedoni, është një frymëzim shtesë për të vazhduar së shkruari me tekstet e tij.
“E gjithë kjo që ne shohim në përditshmëri, që përjetojmë, bisedat e dëgjuara në autobus, në kafene, e gjithë ajo disi gjen rrugën e saj, në një mënyrë riciklohet, dhe nuk e di nëse ne zgjedhin temat ose ata na zgjedhin neve. Por të gjithë e shkruajmë atë që e ndjejmë për së afërmi”, ka shtuar Andonovski.
Për Andonovskin, Maqedonia ka qenë një vend më demokratik në vitet e 90-ta se sa tani. Ndërsa për në fund, Andonovski ka paralajmëruar se do të vazhdojë në përkrahje të protestave deri në rrëzimin e këtij regjimi dhe sundimin e së drejtës. /tesheshi.com/
