Është një histori me të vërtetë e pabesueshme ajo që ka si protagonist Rolf Bantle, një 71-vjeçar zviceran, i cili në vitin 2004 humbi në tualetet e stadiumit San Siro dhe është kthyer në shtëpi 11 vite më pas.
Burri, i cili më 24 gusht 2004 kishte ndjekur Bazelin në një ndeshje të Champions League kundër skuadrës italiane të Interit, nuk kishte arritur të gjente makinën në parkim dhe të kthehej në vendin e tij. Jetoi në rrugët e Milanos dhe gjatë gjithë këtyre viteve shtëpia e tij e dytë u bë lagja Baggio. “Të gjithë nisën të më quanin Rudi. Shumë shpejt nuk kisha më motiv të kthehesha në shtëpi”,- tregon ai.
Historia e Rolf Bantle u tregua nga e përditshmja zvicerane Schëeiz am Sonntag. Duke qenë se nuk gjeti makinën dhe nuk kishte celular me vete, pasi harxhoi edhe 20 eurot që i kishin ngelur në xhep, qëndroi në qytet me ndihmën e studentëve universitarë të lagjes Baggio, të cilët çdo ditë i çonin për të ngrënë, për të pirë e për tu veshur. Situata nisi të rëndohej për shkak të mungesës së një familje dhe të problemeve të tij me alkoolin.
Gjithçka ndryshoi gjatë muajit prill që lamë pas, kur burri u përplas nga një automjet ndërsa ishte duke kaluar rrugën dhe u shtrua në spital. Konsullata zvicerane në Itali pagoi kostot e kurimeve të tij dhe urdhëroi transferimin e burrit në një spital në Bazel dhe më pas në një shtëpi të moshuarish, ku ai jeton edhe tani. “Nuk më mungon jeta në Milano. 10 vite ishin të mjaftueshme. Ishte një ndeshje shumë e gjatë ajo që nisa të shikoj”,- tregon Rolf./tesheshi.com/
