Nga Bashkim Kastrati
Pjesa më e madhe e nxënësve të Kosovës nuk kanë përkrahjen dhe përkujdesjen e psikologëve. Duke marrë parasysh moshën delikate në të cilën janë sidomos nxënësit e shkollave fillore dhe të mesme, prandaj është e domosdoshme që të kenë përkujdesjen e psikologëve. Gjithashtu ka raste kur nxënësit në shkolla nuk arrijnë sa duhet të integrohen në grupet shoqërore apo kanë probleme të ndryshme, si konflikte të ndryshme mes nxënësve si dhe sjellje tjera delikuente, në këto raste një ndihmesë të madhe do ta jepte prania e psikologut dhe ata duhet të jenë pjesë e stafit profesional të shkollave.
Psikologu dhe pedagogu në shkollë në Kosovë parashihen edhe me Ligjin për Arsimin Parauniversitar, në bazë të cilit secili institucion arsimor duhet ta ketë nga një të tillë.
Psikologu në shkollë ka rol të pazëvendësueshëm për të siguruar një kujdes më të mirë për nxënësit por për ta ndihmuar edhe stafin e mësimdhënësve gjatë punës me fëmijë.
Rëndësia e psikologut në shkollë është e rëndësisë së parë. Psikologu në shkollë siguron një kujdes më të mirë për nxënësit, po ashtu i vjen në ndihmë edhe stafit pedagogjik për të punuar më mirë me nxënësit. Mund t’i ndihmojnë edhe menaxhmentit të shkollës në politika të caktuara që ata i zbatojnë në shkollë
Gjithashtu psikologu bashkëpunon me personelin administrativ dhe pedagogjik për konceptimin dhe realizimin e shërbimeve që lidhen me vlerësimin e rezultateve të nxënësve, me orientimin e karrierës dhe me zhvillimin social dhe personal të nxënësve.
Nevoja e psikologut është e domosdoshme duke marrë parasysh që nëpër shkolla ka edhe nxënës me autizëm apo me probleme tjera, të cilëve u duhet një ndihmë e vazhdueshme dhe kjo trajtim më i veçantë sesa nxënësve të tjerë, në mënyrë që ata të integrohen sa më lehtë me pjesën tjetër të nxënësve.
Por aktualisht shkollat e Kosovës po përballen me mungesën e psikologëve. Sipas zyrtarëve të Ministrisë së Arsimit Shkencës dhe Teknologjisë, mungesa e psikologëve në shumë shkolla është për shkak të buxhetit që ka kjo ministri për të punësuar psikologë nëpër shkolla.
Sipas të dhënave të Ministrisë së Arsimit Shkencës dhe Teknologjisë numri i psikologëve të punësuar deri më tani në shkolla të Kosovës është 87. Por ky numër nuk është i mjaftueshëm për të mbuluar të gjitha shkollat dhe nevojat që mund të kenë nxënësit.
Psikologu në shkolla domosdoshmëri
Psikologu Adem Shala, ka thënë për tesheshi.com se pavarësisht shumë ngjarjeve të rënda me protagonistë nxënës e mësues, shumë nga shkollat e Kosovës nuk kanë ende shërbimin e psikologut. Ai thotë se nevoja e psikologut në shkollë është imediate, kjo sepse zhvillimet dhe ndryshimet e vrullshme si zhvillimi intensiv i shkencës dhe teknologjisë, reformat kurrikulare në arsim, kujdesi i shtuar i shoqërisë për mjedisin si dhe edukimin e fëmijëve e bëjnë më të domosdoshme praninë e psikologut në shkolla.
“Prania e psikologut në shkolla ofron qasje psikologjike, sociale dhe emocionale tek nxënësit, duke rritur cilësinë e procesit të mësimdhënies dhe mësimnxënies. Psikologu në shkollë parashihet edhe me ligjin për arsimin parauniversitar, ku secili institucion arsimor duhet ta ketë një të tillë”, thotë Shala.
Sipas tij, mungesa e psikologëve nëpër shkollat e Kosovës mund të sjellë dëme të mëdha për vet shoqërinë dhe për nxënësit në veçanti, pasi nëpër shkolla janë të pranishëm personalitete të caktuara nxënësish, me prirje për ta braktisur shkollën, me probleme emocionale, në sjellje, vështirësi në të nxënë etj.
“Ndaj më shumë se çdo gjë tjetër kjo kategori nxënësish ka nevojë për mbështetje alternative edukuese, për shërbime psikologjike në mënyrë që të frymëzohen, motivohen, të zbulojnë inteligjencën e tyre dhe të kultivojnë në vetvete vlerat njerëzore universale. Prej një rinie të shëndosh intelektualisht, të mirë edukuar, mbesin shpresat për zhvillimin e tërë shoqërisë”, theksoi Shala.
Sidoqoftë në nivelin e arsimit fillor, të mesëm të ulët, që përfshinë arsimin e obliguar 9-të vjeçar, në mbarë Kosovën, sipas të dhënave zyrtare, mësimin e ndjekin rreth 260 mijë nxënës, nga të cilët një numër i madh vetëm në Prishtinë, mbi 30 mijë. Ndërkaq, gjithsej në Kosovë janë mbi 700 institucione shkollore. /tesheshi.com/
