“Topçinjtë” londinezë nuk ia dolën të fitojnë ndaj Mançester Sitit, ashtu siç kanë dështuar shpesh këtë sezon, por më së paku shmangën humbjen.
Lojtarët e Arsene Venger-it shfaqën gjithsesi shenja përtëritjeje ndaj një kundërshtari të tillë si Mançester Siti.
Në “Emirates Stadium,” vendasit u gjendën dy herë në humbje, për të barazuar po dy herë. Sane shënoi për miqtë që në minutën e 5-të. Ashtu siç nisi pjesa e parë, me gol, ashtu dhe do të mbaronte. Walcott barazoi në minutën e 40-të, e dy minuta më pas Aguero edhe një herë tjetër u dha epërsinë “qytetarëve”.
Nuk u desh shumë që të vinte dhe një gol tjetër barazimi, tetë minuta pas nisjes së pjesës së dytë, kur Shkodran Mustafi godet me kokë brenda zonës kundërshtare dhe e çon topin në rrjetë.
Pas barazimit 2-2, Arsenali mban vendin e gjashtë në renditje, me 51 pikë. Dhe kështu është jashtë katërshes së parë, por fakt ngushëllues është se ka dhe dy ndeshje të paluajtura.
Mançester Siti, që të mërkurën e pret një tjetër sfidë e vështirë, ndaj Çelsit, shkon në kuotën e 58 pikëve, një më pak se Liverpuli i vendit të tretë. /tesheshi.com/
