Skuadra tetovare e Shkëndijës ka shkruar historinë në futbollin maqedonas, teksa është kualifikuar për në fazën play-off të Ligës së Europës.
Tre raunde kualifikuese në Ligën e Europës të kaluara nga Shkëndija. Së pari është eliminuar Krakovia polake, më pas Nefçiu azerbajxhanas, e tani para pak minutave, i ka ardhur radha Mllada Boleslavit çek të ketë të njëjtin fat.
Takimi në “Adidas Arena” ka përfunduar 1-0 për vendasit, që kanë shënuar në minutën e 82-të me anë të
Magera-s. Vendasit e Boleslavit nuk mund ta gjejnë sërisht rrjetën e Shkëndijës, edhe pse u akorduan dhe gjashtë minuta shtesë.
Me ndeshjen e parë të përfunduar 2-0 për Shkëndijën, kualifikimi u ka buzëqeshur tetovarëve.
Ata do duhet të presin ditën e nesërme për të mësuar emrin e skuadrës kundërshtare në play-off. Një sukses i mëtejshëm në këtë raund do t’i kalonte në fazën në grupe. Por deri atëherë ka ende kohë, ndërsa lojtarët e Shkëndijës kanë sonte tërë të drejtën të festojnë. /tesheshi.com/
