Skuadra tetovare është e vetmja përfaqësuese e futbollit maqedonas në Ligën e Europës. Shkëndija ka suprizuar çdokënd me kalimin e dy raundeve të para kualifikuese në Ligën e Europës, por tani ajo përgatitet për një tjetër surprizë të tillë, teksa pret sonte në Shkup çekët e Mllada Boleslavit.
Shkëndija do të eliminonte fillimisht polakët e Krakovias, duke i fituar të dy takimet, 2-0 dhe 1-2. Në raundin e dytë kualifikues të Ligës së Europës, përballë do viheshin azerët e Nefçi Bakusë. 0-0 do të përfundonte sfida e parë në Baku, e kualifikimi i Shkëndijës do të vinte nga fitorja 1-0 në përballjen e dytë.
Mllada Boleslavi është një skuadër më me traditë se dy të parat, e formuar që në vitin 1902 dhe me trofe të fituar në Çeki.
Edhe pse do të kenë një kundërshtar të fortë përballë, te Shkëndija besojnë se mund t’ia dalin, për të shkruar një tjetër histori suksesi.
“Na pret ndeshja e radhës kundër Mllada Boleslavit, e cila do të jetë aq e vështirë si ndeshjet
paraprake. Do të jetë një prej rivalëve më të vështirë deri tani, dhe dua që ekipi im në këto ndeshje të hyjë me koncentrim,” ka deklaruar në konferencën e shtypit shefi i stafit teknit të Shkëndijës së Tetovës, Bruno Akrapoviq.
Optimizëm, gjithsesi të matur, ka treguar dhe kapiteni Ferhan Hasani, i cili u ka thënë këto fjalë gazetarëve, “Sa i përket ndeshjes me Mllada Boleslavin, jemi të përgatitur maksimalisht,… jemi të vetëdijshëm se mund ta kalojmë dhe këtë raund.”
Takimi mes Shkëndijës së Tetovës dhe Mllada Boleslavit do të luhet sonte në stadiumin “Filipi i Dytë” të Shkupit. E vlefshme për raundin e tretë kualifikues të Ligës së Europës, përballja do të nisë në 20:00. 90 minutat do të arbitrohen nga një treshe kazakistanase, me kryesor gjyqtarin Artjom Kuçin. /tesheshi.com/
