Një shkencëtar rus i arrestuar në Siberi me dyshimin për tradhti dhe i transferuar në Moskë, pavarësisht se vuante nga kanceri i avancuar i pankreasit, ka vdekur, tha avokati i tij të dielën.
Shkencëtari Dmitry Kolker u dërgua në burgun Lefortovo të Moskës, tha avokati Alexander Fedulov për Reuters.
“Dje (të shtunën) ai vdiq. Nesër do të bëjmë ankesë për paraburgimin”, ka thënë ai.
Familja e Kolker tha se ai u dërgua nga një spital në Novosibirsk, ku mori ushqim përmes një tubi, pas së cilës oficerët e sigurimit të FSB-së e transferuan atë në një fluturim për në Moskë.
Kolker ishte doktor i fizikës dhe matematikës.
Familja tha se ai u akuzua për bashkëpunim me shërbimet kineze të sigurisë, ku më parë ka mbajtur leksione shkencore.
Ata protestuan kundër padisë, duke pretenduar se ai ishte i pafajshëm.
Agjencia shtetërore e lajmeve Tass njoftoi të shtunën se Rusia ka arrestuar një tjetër shkencëtar, Anatoly Maslov, kryeshkencëtar në Institutin e Mekanikës Teorike dhe të Aplikuar në Novosibirsk, me dyshimin për tradhti.
Nuk është e qartë nëse rastet janë të lidhura.
Vitet e fundit, një numër shkencëtarësh rusë janë arrestuar dhe akuzuar për tradhti, pasi dyshohet se kanë kaluar materiale të ndjeshme te të huajt.
Kritikët e Kremlinit thonë se arrestimet shpesh rrjedhin nga paranojë e pabazë.
Tradhtia në Rusi dënohet deri në 20 vjet burg. /tesheshi.com/
