Ballkanadolia, siç quhej kontinenti i harruar, ndodhej midis Evropës, Afrikës dhe Azisë dhe ishte një urë lidhëse për gjitarët nga Azia në Evropë, pohon një grup shkencëtarësh në një studim të ri të botuar në revistën “Earth Science Review”.
Kur nivelet e detit ranë rreth 34 milionë vjet më parë, Ballkani shërbeu si një urë për kafshët për të migruar në Evropën Jugore, përpara se një numër i madh i gjitarëve në Evropën Perëndimore të zhdukeshin gjatë një prej epokave të zhdukjes.
Këtë pohim e bën paleogjeologu Alexis Licht nga Qendra Evropiane për Kërkime të Gjeoshkencës Mjedisore, i cili është edhe profesor në Universitetin e Uashingtonit në SHBA.
Shkencëtarët i bazojnë pretendimet e tyre në fosilet e gjetura në Ballkan, të cilat tregojnë se kafshët emigruan nga Azia pesë deri në 10 milionë vjet përpara se të ndodhte zhdukja në Evropë.
Ata përdorën të dhëna për fosilet nga Ballkani dhe Anadolli, duke i krahasuar me njohuritë më të fundit të historisë gjeologjike dhe rindërtuan ndryshimet paleogjeografike në rajon.
Ata zbuluan se Ballkanadolia në një moment, nga një kontinent i pavarur, u bë një “urë tokësore” kur u bashkua me pjesën kontinentale të Evropës, shkruan “Science Alert”.
Rreth 50 milionë vjet më parë, Ballkani u nda nga kontinentet e tjera dhe kishte botën e tij të gjallë, e cila ndryshonte nga Evropa dhe Azia.
Një kombinim i rënies së nivelit të detit, ngritjes së akullit të Antarktidës dhe shqetësimeve tektonike lidhën Ballkanin me kontinente të tjera 40 deri në 34 milionë vjet më parë, thuhet në studim.
Kjo u mundësoi gjitarëve nga Azia, si brejtësit dhe thundrakët, të vinin në Ballkan, dhe më pas në Evropë, tregojnë kërkimet fosile. Në mesin e fosileve, shkencëtarët kanë zbuluar një kafshë të ngjashme me rinocerontë të gjetur në Turqi, të cilat kanë jetuar 38 deri në 35 milionë vjet më parë, që do të thotë se kafshët nga Azia kanë mbërritur në Ballkan dhe Evropë para zhdukjes së madhe.
Penetrimi nëpër Luginën e Ballkanit ishte shumë më i lehtë për kafshët, sepse rruga përmes Azisë Qendrore ishte shumë më e vështirë për shkak të kushteve të shkretëtirës dhe akullit në disa pjesë. /tesheshi.com/
