Industrializimi i shpejtë gjatë shekullit të kaluar, ka bërë që toka të futet në një epokë të re gjeologjike pas më shumë se 11.500 vite, thonë shkencëtarët.
Një ekip studiuesish thonë se përhapja në gjithë botën e plastikës, metaleve të reja dhe betonit, të kombinuara me ndryshimet klimatike të shkaktuara nga dora e njeriut, ka shtyrë planetin në një epokë të re, të cilën e quajnë epoka Antropocene.
Ndërsa aktiviteti njerëzor ka lënë gjurmë të dukshme në tokë që para epokës aktuale të Holocenit e cila fillon rreth 9,700 vite p.e.s., shkenctarët thonë se ndryshimet e fundit në sistemet globale janë mjaft të njëkohshme dhe të rëndësishme për të justifikuar miratimin e një njësie të re kohore gjeologjike të karakterizuar nga dominimi i njeriut.
Një grup punues në lidhje me epokën Anthropocene (AWG), i cili pritet të takohet në Cape Town gjatë javës, ka propozuar vitin 1950, si datë e fillimit të epokës së re.
Tashmë, shkencëtarët janë në kërkim të një pike reference fizike, që mund të datojë dhe të merret si pikënisje për epokën Anthropocene.
Një shtrat lumi në Skoci, për shembull, është marrë si pikënisje për epokën Holocenit.
Prof Jan Zalasiewicz, palaeobiologjist në Universitetin Leicester dhe pjesëtar i grupit punues, thotë se nivelet e karbonit dhe të azotit në atmosferë kanë mbetur pak a shumë në nivel të njejta deri para shekullit të 20-të .
“Veprimet e njeriut kanë lënë gjurmë në tokë për mijëra vite (para shekullit të kaluar), nëse dini ku t’i kërkoni ato gjurmë”, thotë ai.
“Dallimi në mes të asaj që ka ndodhur gjatë periudhës para shekullit të kaluar dhe asaj që ka ndodhur në shekullin e kaluar, apo më shumë, është se ndikimi është global dhe duke u zhvilluar në të njëjtën kohë në të gjithë sipërfaqen e tokës.
“Kjo po ndikon në funksionimin e gjithë sistemit të tokës”.
Koncepti i epokës Anthropocene është propozuar për herë të parë nga fituesi i çmimit Nobel, kimisti Paul Crutzen dhe kolegu i tij Eugene Stoermer në vitin 2000.
Sipas AWG, ndryshimet në sistemin e tokës të cilat karakterizojnë epokën Anthropocene përfshijnë prezencën e grimcave të plastikës dhe aluminit, si dhe nivele të larta të azotit dhe fosfateve në tokë.
Ai shtoi, megjithatë, se vendet mund të hezitojnë të prezantojnë zonat përfaqësuese si fillim i epokës Anthropocene, për shkak të asociimit të tij negativ.
Pasi të zgjidhet një ose më shumë vende kandidate, do të bëhet propozimi formal për njohjen e epokës përmes një sërë komisionesh, duke përfunduar në Komitetin Ekzekutiv të Unionit Ndërkombëtar të Shkencave Gjeologjike.
Ky proces pritet të zgjasë së paku tri vite. /tesheshi.com/
