Shkencëtarët australianë paralajmërojnë për një “apokalips të insekteve” globale që mund të ketë një efekt radikal në mjedis dhe njerëzimin.
Një studim ndërkombëtar mbi të ardhmen e insekteve i kryer si pjesë e një skenari të ndryshimeve klimatike zbuloi se numri në rënie i insekteve në botë do të zvogëlojë në mënyrë drastike aftësinë e njeriut për të ndërtuar një të ardhme të qëndrueshme.
Bashkautori i studimit William Laurance nga Universiteti James Cook i Australisë tha se biosfera tashmë është ngrohur me rreth 1.1 gradë Celsius që nga periudha para-industriale dhe parashikohet që deri në vitin 2100, nëse emetimet e gazit serrë nuk reduktohen ndjeshëm, ajo do të ngrohet me dy deri në pesë gradë shtesë.
Insektet e vogla që nuk kanë aftësinë për të rregulluar temperaturën e trupit të tyre janë veçanërisht të ndjeshëm ndaj ndryshimeve të temperaturës dhe niveleve të lagështisë, tha Laurance.
“Ka prova në rritje se popullatat e shumta të insekteve në pjesë të ndryshme të botës po pakësohen me një ritëm të shpejtë. Është një prirje thellësisht shqetësuese dhe media, madje edhe disa shkencëtarë, po përdorin gjithnjë e më shumë termin ‘apokalipsi insektesh’ për të përshkruar këtë fenomen”, tha Laurance.
“Insektet janë shumë të rëndësishme në zinxhirin ushqimor dhe reduktimi i numrit të tyre tashmë mund të luajë një rol të rëndësishëm në rënien e përhapur të numrit të konsumatorëve të tyre, përkatësisht shpendëve”, paralajmëroi ai.
“Insektet janë një pjesë e rëndësishme e biodiversitetit. Ato janë të rëndësishme për mjedisin sepse janë përgjegjës për procesin e pllenimit, kontrollin e numrit të dëmtuesve dhe riciklimin e lëndëve ushqyese. E gjithë kjo është e dobishme për qeniet e tjera të gjalla në planet, përfshirë njerëzit”, tha shkencëtari australian.
Studimi zbuloi se ndryshimi i klimës ka ndikuar në faktorë të tjerë që kërcënojnë popullsinë e insekteve, përkatësisht ndotjen, humbjen e habitatit dhe grabitjen – një ndërveprim biologjik në të cilin një organizëm, një grabitqar, vret dhe ha një organizëm tjetër, prenë e tij.
“Çelësi është të menaxhohen habitatet dhe t’i rivendosen ato sa më shumë që të jetë e mundur, në mënyrë që ato të bëhen rezistente ndaj ndryshimeve klimatike dhe t’u sigurojnë insekteve një lloj strehimi ku ata mund t’i mbijetojnë kushteve ekstreme klimatike,” beson Laurance.
“Provat janë shumë të qarta dhe të dukshme. Ne duhet të veprojmë tani për të minimizuar ndikimin negativ në popullatat e insekteve. Ne e dimë shumë mirë si ta arrijmë këtë, por vendimmarrja dhe financimi i nevojshëm shtyhen vazhdimisht”, përfundoi ai. /tesheshi.com/
