Shkencëtarët në Austri kanë krijuar një këmbë artificiale e cila ia mundëson personit që i është amputuar këmba të ndiejë ndjenja të gjalla në këmbë.
Pacienti të cilit i është vënë kjo këmbë, Wolfang Rangger, i cili e humbi këmbën e djathtë në vitin 2007, tha: “Ndihem sikur e kam këmbën përsëri. Më ka dhënë motiv të ri për të jetuar.”
Prof. Hubert Egger i Universitetit të Linz-it, tha se senzorët e vënë te shputa e këmbës artificiale i stimulojnë nervat te baza e cungut të këmbës (v.p. pjesa e gjymtyrës së prerë). Ai shtoi se ishte hera e parë që një protezë e tillë me senzorë i është vënë një pacienti të cilit i është amputuar këmba.
Si funksionon ajo
Kirurgët së pari i rilidhën pjesët fundore të nervave në cungun e këmbës së pacientit për t’i vendosur ata afër sipërfaqës së lëkurës. Gjashtë senzorë i vendosën te shputa e këmbës, për ta matur shtypjen e thembrës, gishtrinjëve të këmbës dhe lëvizjen e këmbës.
Prof. Egger-i tha: “Senzorët i thonë trurit se ka këmbë aty, dhe personi që e bart këtë këmbë ndien sikur ajo po ngritet nga toka kur ai ec.”
Wolfgang Ranger, ish-mësues, i cili e humbi këmbën pasi një droçkë i shkaktoi një sulm në tru, ka gjashtë muaj që është duke e provuar këtë pajisje, edhe në laborator edhe në shtëpi.
Gjymtyra e rrejshme
Ai tha: “Më nuk rrëshqas në akull dhe mund ta dalloj se kur jam duke ecur në zhavorr, beton, bar apo rërë. Mund t’i ndiej madje edhe gurët e vegjël.”
54 vjeçari gjithashtu vrapon, e nget biçikletën dhe bën alpinizëm. Një tjetër dobi që doli nga kjo është zvogëlimi i dhimbjes torturuese që i vinte nga gjymtyra e rrejshme të cilën z. Rangger-i e ka përjetuar për vite me radhë pas amputimit.
Prof. Egger-i thotë se truri tani pranon të dhëna në vend se të kërkojë informata nga gjymtyra që nuk është fare. Ekipi kërkimor austriak i shpaloi rezultatet gjatë një konference për shtyp në Vienë.
Megjithatë ende pritet t’i publikojnë hollësitë në një revistë mjekësore.
Vitin e kaluar një ekip ndërkombëtar krijoi një dorë bionike e cila ia mundëson personit me dorë të amputuar t’i ndiejë gishtrinjtë.
Studimi i tyre u publikua në revistën Science Translational Medicine (Mjekësia Shkencore Përkthyese). /tesheshi.com/
