Kryeministri Ramush Haradinaj vazhdon ta kundërshtojë idenë e presidentit Thaçi për ridizajnim të kufijve dhe shkëmbim të territoreve, duke thënë se një ide e tillë është ftesë për tragjedi të reja në Ballkan.
Ai, në një postim në Facebook, një ide e tillë çon në destabilizim, pasiguri dhe rrezikon investimet afatgjata politike.
Haradinaj thotë se do të vazhdoj fuqishëm të qëndroj kundër siç i ka quajtur ideve shkatërruese, ndërsa u ka bërë thirrje të gjitha vendeve mike dhe institucioneve ndërkombëtare kontribuuese për Kosovën, që të kundërshtojnë këto ide dhe të mos lejojnë që ato të arrijnë në tryezën e vendimmarrjes.
Haradinaj më tej shkruan se Kosova deri më tani ka paguar çmim të shtrenjtë për paqen që e fitoi dhe se shteti nuk do të duhej të rrezikonte për të rifilluar një ndërhyrje të re të NATO-s.
“Kemi qenë të vendosur dhe kemi punuar pandalshëm, në veçanti, për të vendosur marrëdhënie të mira me të gjithë fqinjët tanë, duke përfshirë Republikën e Serbisë. Marrëveshja Përfundimtare Ligjërisht e Obligueshme midis Kosovës dhe Serbisë do të jetë një hap vendimtar për sigurimin e stabilitetit dhe paqes në rajonin tonë. Njohja reciproke dhe paqja e qëndrueshme duhet të jetë rezultati i vetëm kredibil nga kjo marrëveshje”, shkruan ai. /tesheshi.com/
