Sulmuesi i përfaqësueses së Shqipërisë ka shënuar golin e tij të pestë sezonal në MLS, në kampionatin amerikan të futbollit.
Colorado Rapids, skuadra e Shkëlzen Gashit, ka luajtur në orët e para të së shtunës ndaj Real Salt Lake-ut.
Shkëlzen Gashi e ka gjetur rrjetën që në minutën e 5-të, kur një top të kthyer nga portieri kundërshtar e ka gjuajtur saktësisht brenda zonës.
Goli i tij nuk ka mjaftuar për t’i dhënë fitoren Colorado Rapids-it. Real Salt Lake e ka mposhtur kundërshtarin 2-1, pas dy golave të realizuar nga Movsisyan në minutën e 39-të dhe të 48-të.
Gashi ka patur një rritje të vazhdueshme të formës së tij në aventurën e re përtej oqeanit. Vetëm thuajse dy javë më parë ai shënoi një tjetër gol ndaj LA Galaxy-t.
Colorado Rapids mban vendin e tretë në Konferencën Perëndimore, me dy pikë më pak se kryesuesit e Dallas-it, por edhe me një ndeshje më pak. /tesheshi.com/
