Sulmuesi i përfaqësueses së Shqipërisë shënoi në orët e para të kësaj të diele golin e katërt në kampionatin amerikan të futbollit. Ekipi i tij, Colorado Rapids, sfidoi LA Galaxy-n, ku luajnë një numër lojtarësh me emër, mes të cilëve Steven Gerrard.
Gashi shënoi golin e parë të ndeshjes në minutën e 51-të, me një ekzekutim të jashtëzakonshëm nga jashtë zonës. Vendasit do të barazonin 11 minuta më vonë, në një takim që do të përfundonte kështu 1-1.
Një prej lojtarëve më të mirë në fushë, së bashku me portierin e ekipit të tij, Tim Howard, Gashi ka deklaruar pas ndeshjes: “Mendoj se duhet të punoni për çdo ditë, në çdo stërvitje, e nganjëherë topi përfundon në rrjetë, e nganjëherë jo. Prandaj duhet të qëndroni gjithmonë pozitiv, e sot ishte një gol i madh. Mendoj se luajtëm mjaft mirë sonte, dhe mund të kishim fituar, por mirë është dhe një pikë.”
Ndërsa për aktivizimin më tepër në rolin e numrit 10, Gashi ka thënë, “Për mua është e rëndësishme që kam një bashkëbisedim të mirë me trajnerin, që ai thotë çfarë dëshiron e që ne mund ta realizojmë atë. Unë thjesht dua të luaj, të argëtohem e të ndihmoj ekipin.”
Ekipi i Shkëlzen Gashit, Colorado Rapids, mban vendin e dytë në Konferencën Perëndimore, me tre pikë më pak se Dallas-i i vendit të parë, por po ashtu me dy ndeshje më pak. /tesheshi.com/
