Te Colorado Rapids e kanë gjetur shpëtimin. Në vend të fundit në Konferencën Perëndimore, me një fitore, një barazim e gjashtë humbje, pesë prej të cilave të njëpasnjëshme, për Colorado Rapids ka më në fund dritë falë Shkëlzen Gashit.
Colorado Rapids ka fituar 3-0 ndaj San Jose Earthquakes; e dyta fitore sezonale në MLS-në amerikane.
Dy prej golave janë shënuar prej Shkëlzen Gashit, në të dytën ndeshje të tij ku është aktivizuar gjatë tërë 90 minutave. Fitorja ka ardhur ndaj ekipit të Jahmir Hykës, një tjetër shqiptari në kampionatin e futbollit përtej oqeanit.
Ja ç’shkruan faqja zyrtare e klubit të Gashit për këtë fitore: “Dy gola nga Shkëlzen Gashi dhe një nga Dominique Badji e katapultuan Colorado Rapids-in në fitoren më të madhe ndaj San Jose Earthquakes-it që nga viti 2002… Ky ishte një Rapids që kishte humbur pesë ndeshje rresht, e që ishte pa një fitore prej ditës hapëse të sezonit, por kjo nuk u demonstrua teksa ata dominuan që nga bilbili i parë.”
Ndërkohë që The Denver Post shprehet kështu: “Më në fund i shëndoshë dhe në formë, i parapëlqyeri i tifozëve Shkëlzen Gashi shënon dy herë.”
Gashi ka vuajtur këtë sezon nga probleme fizike, dhe vetëm ndeshjen e shkuar luajti për herë të parë përgjatë 90 minutave. Mungesa e tij ka ndikuar drejtpërdrejt në rezultatet e Colorado-s.
Në anën tjetër të fushës, Jahmir Hyka luajti për 72 minuta për San Jose Earthquakes, për t’u zëvendësuar më pas. Ai po ashtu ka shënuar dy gola në sezonin e tij të parë në Major League Soccer. /tesheshi.com/
