Kur Edi Rama e mori Shkëlqim Canin për të hartuar programin ekonomik të Partisë Socialiste, e lançoi në publik si një veprim autokritik të partisë që rregullon një faj të Fatos Nanos, që hoqi një nga njerëzit më të përgatitur në financë nga drejtimi i vendit.
Dhe në fakt ashtu ka qenë. Kur Fatos Nano mori Shkëlqim Canin në krah të tij në qeverinë e ndryshuar të Ramiz Alisë, e bëri duke e konsideruar atë si një nga financierët më premtues të vendit.
Kur Nano erdhi në pushtet në vitin 1997, nuk e thirri mikun e tij Shkëlqim Cani si bashkëpunëtor në kabinetin qeveritar, por e ruajti për ta bërë Guvernator të Bankës së Shqipërisë.
Nano e bëri këtë veprim për të mos e patur mikun e tij “kapriçoz” në krah duke e ditur se financieri dibran nuk e ka “zellin politik” si pikën e tij më të mirë.
Por edhe në këtë post Shkëlqim Cani nuk qëndroi i heshtur, por kundërhstoi Fatos Nanon disa herë.
E fundit ishte një transaksion i Nanos për privatizimin e një banke të madhe, për të cilën Cani doli kundër. Gjithçka lidhej me Greqinë.
Dhe Fatos Nano e degdisi menjëherë, duke thirrur në krye të Bankës së Shqipërisë një person me lidhje të dyshimta transaksionesh siç ishte famëkeqja Banka Italo-Shqiptare.
Shkëlqim Cani iu rikthye punës së tij si pedagog i Faktultetit të Ekonomisë duke dhënë mesazhe të forta kundër monopoleve dhe kriminalizimit të Ekonomisë.
Edi Ramës i leverdiste shumë në atë kohë që të bënte “flamur” çështjen e dekriminalizimin të Ekonomisë. Dhe Shkëlqim Cani hartoi programin ekonomik të socialistëve, duke e vendosur si pjesë thelbësore zhdukjen e monopoleve.
Mirëpo me të ardhur në pushtet, Edi Rama mori një vendim të çuditshëm: kush emërohej ministër, nuk mund të ishte njëherësh dhe deputet; që do të thoshte se menjëherë duhej të dorë nga mandati. Të gjithë e bënë përveç njërit, Shkëlqim Canit.
Një mesazh i qartë se pakti mes tij dhe Edi Ramës do të përfundonte para kohe. Ishte vetëm çështja se kur, dhe ndodhi sot. Arsyeja?!
Pritet të zbardhet, vetëm dihet nga burime të sigurta që Cani ka pasur shumë përplasje me kryeministrin e tij, së pari për drejtorët e Doganave dhe Tatimeve, dy vajzat e reja që akademiku nuk e mendonte që ishin zgjidhje. Dhe koha i dha të drejtë.
Dhe Edi Rama, në vend që të hiqte Briseidën, shkarkoi Shkëlqim Canin. Por a do të jetë akademiku i vetëm në Partinë Socialiste deputet në legjislaturën tjetër?!
Burimet thonë që “po”, madje Rama do ta vendosë sërish në hartimin e programit ekonomik pas kongresit të muajit mars. /tesheshi.com/
