Nga Blendi Gashi
Se Universiteti i Prishtinës është në gjendje thuajse degraduese, me rënie të statutit, vlerave dhe reputacionit kjo është një fakt i pamohueshëm, pasi jo pak analfabet janë bërë me diploma dhe më pas bëjnë punën e mësuesit apo profesorit në shkollat fillore e të mesme.
Shkaktari kryesor pse ky institucion i dijes ka ardhë në këtë derexhe është politika e cila ka shtrirë dorën përmes emrimeve partiake.
Se gjendja në UP është brengosëse e tregon edhe Auditi i cili në raportin për vitin 2016-të ka gjetur shkelje të mëdha.
Një nga më flagrantet është kompensimi pa kontratë i një profesori i cili merr rrogë të plotë nga viti 2010, me arsyen se ka probleme shendetesore.
“Në Fakultetin e Inxhinierisë Elektrike kemi vërejtur se një profesori që nga viti 2010 nuk iu ka përtërirë kontrata, mirëpo i njëjti vazhdon të kompensohet me pagë të plotë. Gjatë diskutimeve me zyrtarët e UP-së kemi kuptuar se shkak për mos vazhdimin e kontratës ishin problemet e tij shëndetësore. Megjithëse, ai kompensohet në vazhdimësi edhe pse nuk ofron shërbimet për çka kompensohet”, thuhet në raport.
Auditi tërheq vërejtjen se pagesat ndaj personit i cili nuk është i aftë të ofrojë shërbimet paraqesin barrë të panevojshme, dhe dëmtojnë buxhetin e UP-së, dhe se mbajtja në listën e pagave e personit në fjalë, për shkak të kufizimeve buxhetore e pamundëson rekrutimin e një stafi i cili do të ofronte shërbimet e nevojshme
Auditi rekomandon që rektori i UP-së në bashkëpunim me njësinë akademike duhet të bëjnë një zgjidhje të pranueshme për personin në fjalë, ndërsat shton se duhet të verifikohet nëse ka raste tjera të ngjashme, dhe të ngritet çështja tek organet kompetente, pasi asnjë pagesë nuk duhet të bëhet nëse paraprakisht nuk janë pranuar shërbimet.
Ja shkeljet tjera…
Një shkelje tjetër është edhe mosplanifikimi i buxhetit. Po ashtu për shkak të mosefikasitetit në menaxhimin e proceseve, dy projekte të mëdha kapitale nuk kanë mundur të finalizohen. Në fakt projekti për ndërtimin e Fakultetit të Shkencave Matematiko-Natyrore me vlerë 114 mijë euro nuk ka filluar fare për shkak të problemeve pronësore rreth vendndërtimit. Mjetet e planifikuara për ketë projekt në muajin tetor janë ridestinuar për projektin për renovimin e objekteve universitare. Derisa për projektin e Ndërtimit të Dekanatit të Mjekësisë, nga 400 mijë euro sa ishin të buxhetuara, për shkak të menaxhimit jo të mirë janë shpenzuar vetëm 271,687 euro, apo 68% prej tyre.
Një tjetër gjetje e Auditit është mungesë e dëshmive për orët e mbajtura nga profesorët. Në tetë nga 97 mostrat e testuara, Auditi ka vërejtur se profesorët nuk shënojnë fare orën dhe datën e mbajtjes së ligjëratës, e disa të tjerë shënojnë vetëm fillimin e orës së mbajtjes së ligjëratës.
“Përderisa zyrtarët përgjegjës për kalkulimin e orëve të mbajtura e bëjnë kalkulimin pa ato dëshmi përkatëse. Po ashtu, në një rast nuk na janë ofruar fare dëshmitë (vijueshmëria) e mbajtjes së ligjëratave, derisa i punësuari kishte marr pagë të plotë”, thuhet në raport.
Një tjetër gjetje është shmangia nga kërkesat për menaxhimin e kontratave. Për kontratat “Rregullimi i kulmit të Bibliotekës Universitare” me vlerë 105,710€ dhe “Renovimi i platos -llot 1” me vlerë 72,205€, nuk janë caktuar menaxherët e kontratave dhe nuk janë hartuar planet për menaxhimin e kontratave, ndërsa kjo është kërkesë e rregullave të prokurimit
Tjetër problem është menaxhimi i obligimeve të papaguara. Auditi ka vërejtur se pesë fatura të pranuara për muajt maj, shtator dhe dhjetor 2015 në vlerë 160,874€ nuk ishin raportuar si obligime në PVF-të 2015. Të njëjtat janë paguar gjatë vitit 2016.
“Po ashtu tri fatura me vlerë 2,168€, të vitit 2016 ishin paguar në 2017, derisa nuk figuronin në listën e obligimeve. Kjo është pasojë e asaj që nuk bëhen raportime të rregullta mujore të obligimeve”, thuhet në raport./tesheshi.com/
