Vetëm pak më tepër se tre muaj ka zgjatur për Besnik Hasin detyra si trajner i skuadrës polake të Legias së Varshavës.
Një njoftim i shkurtër, me vetëm dy fjali, në faqen zyrtare të Legias, ka lajmëruar për shkarkimin e Hasit dhe për zëvendësimin e tij përkohësisht me ndihmëstrajnerin aktual, Aleksandar Vukovic.
Legia e Varshavës u kthye në Champions League pas një mungese shumë të gjatë, dhe ky ishte një sukses për Hasin. Por më pas gjërat nuk shkuan ashtu siç duhet.
Ekipi i tij humbi mbrëmë në kampionat 2-3 me Zaglebie Lubinin, çka solli më pas shkarkimin e Besnik Hasit. Kjo ishte humbja e katërt e Legias në në nëntë javë të kampionatit polak, duke u renditur në vendin e 14-të mes gjashtëmbëdhjetë skuadrave. Humbja e thellë, 0-6, të mërkurën e shkuar me Borusian e Dortmundit në Champions League, ka pa dyshim pjesën e vet në shkarkimin e mbrëmshëm.
Një ish-lojtar i kombëtares shqiptare, Hasi ka drejtuar më herët Anderlehtin, në Belgjikë, ku ka kryer si rolin e ndihmëstrajnerit për shumë vite, po ashtu dhe të trajnerit të parë. Si lojtar, pjesën më të madhe të karrierës ai e ka kaluar në kampionatin belg, ku është aktivizuar me disa skuadra.
Ai do të ishte këtë verë mes kandidatëve për të marrë drejtimin e Trabzonsporit në Turqi, për të përfunduar më pas te Legia e Varshavës. /tesheshi.com/
