Bëmat korruptive të autoriteteve të organizmit botëror të futbollit nuk kanë të mbaruar. Një tjetër zyrtar me peshë është detyruar ta lërë detyrën për shkelje financiare.
Markus Kattner, me detyrën e përkohshme të sekretarit të përgjithshëm të FIFA-s, është shkarkuar menjëherë ditën e djeshme, i akuzuar se e ka shpërblyer veten me vlera që shkojnë në miliona euro.
Një hetim i brendshëm ka zbuluar se gjermani 45-vjeçar i ka taksur vetes në një periudhë të gjatë kohore shpërblime financiare të pajustifikuara.
Kattner do të niste të punonte në FIFA që nga viti 2003 si drejtor i financave. Katër vite më vonë ai do të bëhej zëvendëssekretar i përgjithshëm. Pasi Jerome Valcke u shkarkua për parregullsi, Markus Kattner u emërua sekretar i përgjithshëm i përkohshëm i FIFA-s.
Rroga dhe shpërblimet e tij kanë qenë pjesë e një kontrate që nuk është parë nga organet përkatëse të organizmit botëror të futbollit.
FIFA e ka bërë të qartë se nuk do të japë më hollësi mbi çështjen, por do të vazhdojë të bashkëpunojë me organet e duhura.
Kongresi i FIFA-s i ditëve më parë e ka zgjedhur tashmë sekretarin e përgjithshëm. Dhe është për herë të parë një grua, Fatma Samoura, një senegaleze që ka punuar për OKB-në dhe që do ta nisë detyrën muajin tjetër. /tesheshi.com/
