Shkarkohet nga detyra e Drejtorit të burgut të Korçës, Robert Kodra. Vendimi është marrë nga ministri i Drejtësisë, Gazment Bardhi.
Burime zyrtare nga Ministria e Drejtësisë bëjnë me dije se shkarkimi i Robert Kodrës është bërë me motivacionin e keqmenaxhimit të institucionit dhe shkeljes së rregullave mbi aplikimin e lejeve shpërblyese ndaj të dënuarve, me pasoja të rënda.
“Nga hetimi administrativ i realizuar nga strukturat përgjegjëse ka rezultuar se jemi përpara rastit të shkeljes së ligjit dhe Rregullores së Përgjithshme të Burgjeve, që ka sjell pasoja të rënda për funksionimin normal të institucionit, si dhe mungesës së informimit të Ministrit të Drejtësisë për praktikat e lejeve shpërblyese, brenda 5 ditëve nga dhënia e tyre, sic parashikohet në aktet ligjore dhe nënligjore në fuqi”, shprehen burime zyrtare nga Ministria e Drejtësisë. /tesheshi.com/
