Opozita kërkon analizim më të thelluar të amendamenteve kushtetuese nga ana e ekspertëve për të kuptuar nëse janë në përputhje me ligjin, në rastin e zgjedhjes së kryeprokurores së përkohshme, Arta Marku. Kërkesa vjen nga deputeti demokrat Enklejd Alibeaj në mbledhjen e përbashkët të Këshillit të Legjislacioneve dhe komisionit të Ligjeve, që merr në shqyrtim kërkesën e bërë nga PD-ja për shkarkimin e kryeprokurores së Përkohshme Arta Marku. Sipas PD-së zgjedhja e Kryeprokurores është bërë në kundërshtim me Kushtetutën.
Alibeaj kërkoi nga ekspertët një analizë më të thelluar të situatës.
“Do të doja nga ekspertët një analizë më të thelluar. Për të kuptuar nëse amendamenti kushtetues është në përputhje me ligjin. Emërimi i një kryeprokurori të Përkohshëm siç ka ndodhur me votat politike të njërës anë, sa e ka potencialin për të ndërhyrë për të diktuar zgjedhjen e 6 anëtarëve që vijnë nga Prokuroria”, tha Alibeaj. /tesheshi.com/
