Himara ka fituar dhe një tjetër përmasë prej disa orësh, atë që i përket politikës së brendshme. Qyteza simbol e antagonizmit diplomatik Tiranë – Athinë, apo dhe e fërkimeve historiko-etnike shqiptaro-greke, po bëhet njëherësh shkak për një zhvillim të pazakontë në politikën e brendshme. Partia Demokratike po farkëton aty aleancën e saj me PBDNJ-në e Vangjel Dules, i distancuar nga Rama dhe në konflikt të hapur me të që nga reforma territoriale, prej së cilës Himarës iu bashkua Vranishti i Labërisë; që pra sipas mendësisë së fqinjit jugor, enklava e saj e kulluar helene u “bë pis” nga elementi lab.
Këto ditë, i deleguari i Partisë Demokratike në qarkun Vlorë, Flamur Noka – pra një kuksian i rënë në Labëri e Bregdet – ka shkarkuar kreun e PD-së së Himarës duke e zëvendësuar me një eksponent të spikatur të partisë së Vangjel Dules.
Konkretisht është shkarkuar Kristo Çipa dhe në vend të tij është emëruar Andrea Gjoni, aktualisht sekretar i PBDNJ-së për Himarën.
Në një mënyrë të hapur ky veprim ka çarë degën e PD-së në zonën e Himarës.
Çipa, një themelues i PD-së, poet dhe pedagog, deklaroi për tesheshi.com se ky veprim është shkelje e hapur e çdo norme, por më e rëndësishmja është se është ndryshuar destinacioni politik i PD-së duke u afruar tek pozicionet pro greke dhe qarqet e Athinës.
Më konkretisht, Andrea Gjoni është jo vetëm eksponent i PBDNJ-së por edhe bashkëpunëtor në biznes me Fredi Bejlerin, kandidati i PBDNJ-së për Himarën dhe kryetari i degës së partisë së Dules.
Të gjitha këto veprime janë bërë pas një afrimi të qarqeve të PD-së me politikat greke, kryesisht të përfaqësuar nga Sali Berisha, i cili në Kuvend ka mbrojtur pozicionet e Athinës dhe ka sulmuar Ankaranë për çështjen e Marrëveshjes së Ujrave.
Por ngjarja e Himarës ka një konotacion më të thellë pasi prish bazën kombëtariste të PD-së në atë zonë. Në vitin 2000, PS dhe PD u bënë bashkë për të mbështetur një kandidat shqiptar përballë atij të PBDNJ-së, Vasil Bollanos.
Por në vitin 2003 ishte PD që lëvizi dhe mbështeti këtë të fundit, i cili ka pasur marrëdhënie të mira me qeverinë e PD-së.
Me këtë lëvizje, PD i jep aksione Nikollaq Neranxit, i cili pritet të kandidojë për kryetar bashkie si kandidat i të gjithë opozitës në zgjedhjet e vitit 2019.
Është Neranxi me Bejlerin dhe Nokën që kanë spastruar degën nga “pendekuqtë” e Pilurit, siç quhen militantët që vijnë nga fshati malor i Himarës, i cili ka refuzuar që të flasë greqisht.
Prej kohësh, Athina po nxit një aksion politik trazirash në Himarë, duke e ngritur edhe në nivel diplomatik çështjen e prishjes së disa banesave për të zbatuar planin rregullues të qytetit.
Çipa ka zhvilluar një takim me kreun e PD-së ,Lulzim Basha, i cili ka premtuar se do ta zgjidhë situatën; por në fund Flamur Noka ka pasur dorë të lirë për të vepruar. /tesheshi.com/
