Presidenti serb Vuçiç ka deklaruar se pas pranimit të kërkesës së Kosovës për anëtarësim në Këshillin e Evropës, do të ketë “ndryshime të thella dhe thelbësore” në politikën e jashtme të Serbisë.
Siç është paralajmëruar pas seancës së Qeverisë së Serbisë, në të cilën ka marrë pjesë edhe Vuçiç, do të fillohet me hartimin e një dokumenti strategjik në fushën e politikës së jashtme, i cili do të përcaktojë saktësisht marrëdhëniet e Serbisë me vendet e tjera, të udhëhequr nga marrëdhëniet bilaterale dhe reciprociteti.
Dje për aplikimin e Kosovës në Këshillin e Evropës votuan 33 nga 45 vende, mes tyre Kroacia, Maqedonia e Veriut dhe Mali i Zi, ndërsa Bosnja abstenoi.
“Në politikën tonë të jashtme kujdesemi për marrëdhëniet dypalëshe, kujdesemi që të mos kalojmë kufijtë e reciprocitetit. Pra, nëse dikush nuk e respekton integritetin territorial të Serbisë, pse duhet të jemi të detyruar të respektojmë integritetin e saj territorial. Por, kjo pjesërisht bie ndesh me pikën e parë të strategjisë sonë, e cila sigurisht do të jetë respektimi i Kartës së Kombeve të Bashkuara, normave të Kombeve të Bashkuara”, tha presidenti i Serbisë.
Kërkesa e Kosovës
Komiteti i Ministrave të Këshillit të Evropës vendosi në një seancë të jashtëzakonshme që kërkesën e Kosovës për pranim në atë organizatë pan-evropiane t’ia përcjellë Asamblesë Parlamentare për konsultim.
Në vendimin e publikuar në faqen e Këshillit të Evropës, Komiteti i Ministrave i referohet marrëveshjes për rrugën e normalizimit të marrëdhënieve ndërmjet Kosovës dhe Serbisë nga 27 shkurti dhe aneksit të zbatimit të saj nga 18 marsi, në të cilën liderët e të dyja palët arritën një marrëveshje në një dialog me ndërmjetësimin e BE-së, njoftoi agjencia Beta.
Kosova aplikoi për anëtarësim në Këshillin e Evropës në maj të vitit të kaluar, kur zëvendëskryeministrja dhe ministrja e Punëve të Jashtme dhe Diasporës së Kosovës, Donika Gervalla, në selinë e asaj organizate ndërkombëtare në Strasburg e dorëzoi aplikacionin zyrtar të Kosovës për anëtarësim në KE. /tesheshi.com/
