Piktura e Pablo Picasso-s “Gruaja me një orë” (Femme a la montre) e vitit 1932 u shit në ankand për 139.4 milionë dollarë, njoftoi shtëpia e ankandeve Sotheby’s.
“Kryevepra e Pablo Picasso-s u shit për 139.4 milionë dollarë, duke e bërë atë veprën e dytë më të vlefshme të artistit të shitur ndonjëherë në ankand dhe më të vlefshmen këtë vit”, tha shtëpia e ankandeve në një postim në rrjetin social X (Twitter).
Çmimi fillestar i pikturës ishte 120 milionë dollarë, ku muza e Picasso-s, Marie-Therese Walter ishte përshkruar në kanavacë, sipas BBC.
Që nga viti 1968, piktura ishte në koleksionin privat të një banoreje të pasur të New York-ut, Emily Fisher Landau, e cila vdiq këtë pranverë në moshën 102-vjeçare. /tesheshi.com/
