Shitet në rulotë të zakonshme, e veçanta e hot dogut 100 dollarësh (foto-video)

Nëse je vetëm pak metra larg Shtëpisë së Bardhë, mund të blesh një hot dog për vetëm një dollar. Jo se është ndonjë shije për të bërë uauu, por kaq lirë është. Kur në zemër të Uashingtonit kushton 120 lekë, në Shqipëri një hot dog vërtitet midis 50 deri 200 lekë, varet nga cilësia e salsiçes që fusin brenda.

Por ja që ka edhe një hot dog që kushton jo pak por 100 dollarë ose më shumë se 12 mijë lekë të reja. Ai po shitet në kontinentin e largët Australi, dhe siç shikoni fotot e mëposhtme, ka një paraqitje ndjellëse dhe të fisme.

E veçanta e këtij hot dog-u është se salsiçja është bërë me mish viçi dhe jo si rëndom të tjerët me mish pule dhe as me derr. E mbi të gjitha, në vend të salcave të zakonshme, mustardës së verdhë dhe keçapit, përdoret mustarda e zezë e cila i përket origjinës së largët të vitit 1747.

Kjo mustardë ka përbërje nga kërpudhat dhe përdorej nga francezët duke u shërbyer me verë të bardhë. Australianët e njohin mirë këtë mustardë. Por jo vetëm ata. Sepse tashmë ky hot dog po shitet edhe në Nju Jork të SHBA-ve dhe ka mbërritur në Paris të Francës, Londër të Britanisë së Madhe, etj.

Dhe mos prisni që të shitet në restorante luksi. Jo jo, e gjeni thjesht te disa rulota të zakonshme. /tesheshi.com/