Andi Agaraj dhe Eni Qirjako janë dy specialistët e IT te Drejtoria e Tatimeve, të cilët morën të dhënat personale për të mbi 650 mijë qytetarëve, duke ja shitur më pas dy përmbaruesve, Klodian Sota dhe Endri Ikonomi. Janë pikërisht këta personat e arrestuar me urdhër të Prokurorisë, të cilët do hetohen mbi “Pse”-në e madhe të kësaj afere, nëse pas saj fshihen qëllime politike.
Ditë më parë, u raportua zbulimi i njeriut kryesor të të dhënave, pa iu thënë emri, i punësuar si i LSI-së në Tatime që në kohën e bashkëqeverisjes me PS-në.
Ai është pikërisht Andi Agaraj, i cili sipas prokurorisë ka shitur të dhënat personale te dy përmbaruesit, ishte teknik IT në Drejtorinë e Tatimeve i punësuar me një kontratë provizore në mars të 2013, në kohën kur ishte ende në qeverisje Partia Demokratike, e më pas i stabilizuar me kontratë me kohë të plotë në 2014, kur në krye të Tatimeve ishte Briseida Shehaj, e propozuar nga PS, por prej kohësh e lidhur me LSI, me të cilën edhe u kandidua, siç raporton Shqiptarja.com.
Kryeprokurorja e Tiranës Elisabeta Imeraj tregoi rolin që kanë pasur dy punonjësit e Drejtorisë së Tatimeve që janë arrestuar nga policia në lidhje me publikimin e listës së pagave.
“Janë kryer veprimet hetimore në mënyrë intensive. Është vijuar me sekuestrimin e serverëve, kompjuterëve duke dalë në përfundimin e një dyshimi të arsyeshëm të bazuar në prova.
Kemi zbuluar katër autorë të ngjarjes. Dy janë punonjës në drejtorinë e tatimeve, punonjës IT. Ka dyshime se të dhënat kanë rrjedhur prej tyre.
Specialistja e IT e punësuar te AKSHI duke pasur akses në të dhënat personale ka hyrë duke marrë këto të dhëna personale dhe i ka shpërndarë te kolegu i saj i cili ka shfrytëzuar këto të dhëna dhe ia ka shitur këtyre subjekteve. Punonjës të caktuar kanë arritur të shfrytëzojnë detyrën e tyre. Prokuroria vazhdon hetimet intensive.
Sekuestrimi është bërë në drejtorinë e tatimeve dhe në DPSHTRR pas daljes së listës së targave. Duke pasur parasysh faktin që një veprimtari e tillë ka disa muaj që zhvillohet që nga skandali i patronazhistëve, prokuroria janë në funksion të plotë me veprime të plota”, tha Imeraj. /tesheshi.com/
