Marrëveshja e 18 Majit mes dy partive të mëdha që solli në qeverinë e majtë 6 ministra dhe një zv/kryeministër teknik nga PD-ja me qëllim kontrollin e përfshirjes së administratës në zgjedhje, po jep frytet e saj.
Penalizimet e para kanë prekur drejtpërdrejt LSI-në me shkarkimin e disa drejtorëve rajonalë të saj, ndërsa hetimet për korrupsion zgjedhor kanë prekur edhe një deputet.
Kështu, janë shkarkuar 3 drejtorë në burgje dhe shkarkimi i drejtorit të spitalit rajonal në Berat, të gjithë me akuzën e përdorimit të institucionit për fushatë elektorale dhe për korrupsion zgjedhor.
Drejtori i Burgjeve, Arjan Hoxha, i emëruar nga PD-ja ka sqaruar sot arsyet e shkarkimit duke bërë të ditur se ish-drejtorët i përdornin institucionet e burgjeve për arsye partiake, fiknin kamerat dhe manipulonin regjistrin e lejeve të të burgosurve.
Pas ankesës publike të tyre për shkarkim të padrejtë, Hoxha i fton që ta çojnë çështjen në rrugë ligjore.
Bashkë me 3 drejtorët e burgjeve ministri i ri i Drejtësisë, Gazmend Bardhi ka shkarkuar edhe 5 zyrtarë tjerë të lartë të zyrave rajonale të Hipotekave.
Në Berat, ku lufta e PS-së dhe PD-së me LSI-në është e fortë për një mandat deputeti, kanë shkuar para akuzës drejtori i shkarkuar dhe deputeti aktual i LSI-së Gledion Rehovica. Policia ka bërë të ditur se të dy ata janë nën hetim pasi akuzohen për “korrupsion aktiv në zgjedhje” dhe “Përdorimi i funksionit publik në veprimtari politike ose zgjedhore”.
Para se lajmi të bëhej publik ishte kryetari i PD-së Lulzim Basha që në emisionin opinion mbrëmë tha se “më njoftojnë se drejtori i spitalit në Berat sapo është arrestuar nga policia. Këta kanë pasur një skemë që është zbuluar në rrugë operacionale për të blerë votat”.
Në fakt ka qenë ministri i Shëndetësisë i propozuar nga Basha i cili ka vajtur sot vetë në Berat për të emëruar drejtorin e ri dhe për t’i bërë thirje administratës së spitalit që të shmanget nga fushatat e partive.
Duke dhënë një apel për gjithë spitalet e vendit, ministri Arben Beqiri u shpreh se “është e rëndësishme që të gjithë punonjësit dhe personeli i shëndetsisë të mos ketë kundavajtje me ligjin”.
LSI shpërndau një letër, ku i drejtohej institucioneve kryesore në vend dhe trupit diplomatik, me të cilën shpreh shqetësimin e saj për shkarkimet që po bëhen nga qeveria dhe kryesisht ministrat teknikë. Sipas LSI, asnjë marrëveshje politike nuk mund të jetë mbi ligjet dhe të instalojë atë që në letër është cilësuar si “qeverisje policore”.
Spastrimi i adminisratës nga drejtorët e LSI-së nisi fill pas ngritjes së Task Forcës së Monitorimit të Administratës. Shkarkimi i parë i bujshëm ishte ai i Drejtorit të Përgjithshëm të Postave, Majlind Lazim, i cili u akuza për shkelje të ligjit elektoral dhe ushtrim presioni ndaj punonjësve për interesa elektorale.
Gjithashtu ka pasur shkarkime nga drejtoritë rajonale të postave dhe ato arsimore.
Fshesa e ministrave teknikë ka penalizuar dhe emërime të Partisë Socialiste, siç ishte shkarkimi i drejtoreshës së Shërbimit Kombëtar të Punësimit, Marisa Kaçori, etj../tesheshi.com/
