Shirat në Tiranë kanë turbulluar ujëmbledhësin e Bovillës ndaj Bashkia ka vendosur të ketë kufizime të ujit të pijshëm. Gjatë inspektimit në impiantin e filtrimit, kryebashkiaku Erion Veliaj tha se Bovilla është ndotur 4 herë më tepër se normat e lejuara, ndaj qyteti do te këtë kufizime në ditët në vijim. Kryebashkiaku ka inspektuar situatën në ujëmbledhësin e Bovillës.
“Filtrat tanë arrijnë që me sasi të kufizuar të filtrojnë ujin e ta bëjnë të pijshëm, megjithatë duke qenë se turbullira është përtej normales, do të thotë se për 4 herë më shumë ndotje, reduktojmë sasinë e filtrimit”, shpjegoi Veliaj, sipas të cilit kufizimi në ujin e pijshëm ka për qëllim vetëm për të garantuar jetën e qytetarëve dhe për të mos çuar këtë ujë në çezmat e tyre.
“Besoj se është më mirë që një lajm të keq ta themi në mënyrë të drejtpëdrejtë, siç është, se sa të bëjmë akrobacira që do të jenë të pafalshme, ndaj duke nisur nga nata e sotme do të ketë kufizim të ujit të pijshëm”, deklaroi ai.
Zonat që furnizohen nga Bovilla do të kenë kufizime për një kohë të pacaktuar, në varësi të situatës, për shkak se proçesi i filtrimit ka nevojë për kohë. /tesheshi.com/
