Një pjesë e mirë e Europës është përfshirë nga një mot me shira të rrëmbyeshëm në ditët e fundit.
Franca, Belgjika, Gjermania, Polonia e Rumania do të përballen me të njëjtën situatë dhe në fundjavë. Shirat do të shoqërohen me erëra të fuqishme, me rrufe e përmbytje.
Siç ka ndodhur së fundi në Gjermani e Francë, ku veç dëmeve materiale, ka patur dhe pesë viktima.
Trupat e tre njerëzve të vdekur janë nxjerrë nga një shtëpi prej ekipeve të shpëtimit në qytezën bavareze Simbach am Inn, ndërsa u gjet dhe trupi i një gruaje po ashtu të vdekur. Ndërkaq, në Francë ka humbur jetën një 86-vjeçare.
Zona më e prekur nga shirat dhe përmbytjet në jug të Gjermanisë është distrikti Rottal Inn. Përndryshe, në Triftern lumenjtë kanë dalë nga shtrati, duke marrë me vete makina, pemë e sende shtëpiake.
Banorët janë shpëtuar me helikopter, pasi në shumë vende niveli i ujit është mjaft i lartë. 250 fëmijë të mbetur brenda një shkolle në Triftern u arritën të nxirren mbrëmjen e së mërkurës që andej.
Shirat e pezulluan plotësisht në fillim të kësaj jave në Francë dhe turneun e tenisit French Open, diçka që nuk ndodhte që prej 16 vitesh.
Parashikimet meteorologjike nuk janë shpresëdhënëse për ditët në vazhdim. /tesheshi.com/
