Shinasi Rama të enjten me studentët e Elbasanit, për të promovuar librin e tij “Rrethi i ferrit”
Në dhjetor ai ndodhet në Shqipëri. Nuk ka marrë shumë vëmendje, megjithëse me deklaratat që bën “i vë flakën” politikës së sotme shqiptare.
Është aktualisht profesor në Departamentin e Politikës dhe drejtor i programeve master në Neë York University në SHBA. Mban statusin e një prej ish-bashkëthemeluesve të Partisë Demokratike në Shqipëri, si dhe të njërit prej studentëve më të angazhuar në Lëvizjen e Dhjetorit `90. Në një ndalesë me studentë dhe intelektualë të Elbasanit, është orvatur të hedhë idenë se vendit i duhet një politikë e re, një sistem i ri dhe një vizion për të ndërtuar atë që ai e quan shtet-komb shqiptar.
Mbështetet nga një grup intelektualësh shqiptarë në diasporë dhe i thotë troç ato që mendon. Në 25-vjetorin e ndryshimeve demokratike dhe lëvizjeve të Dhjetorit `90, Shinasi Rama shprehet se askush nga politikanët e sotëm nuk ishte ndër nismëtarët dhjetoristë.
“Politikanët që janë sot në krye, nuk kanë pasur asnjë rol në lëvizjen studentore të dhjetorit 90-të. Ne i kemi refuzuar, edhe si mbështetës edhe si intelektualë ata që janë sot. I kemi parë thjeshtë si interlokutorë të sistemit komunist dhe si njerëz të dërguar nga Ramiz Alia e Xhelil Gjoni për të marrë kontrollin e opozitës.
Përplasja jonë me ta ka qenë e dhunshme dhe një ndër arsyet pse ne të “Dhjetorit” nuk jemi sot në politikë, është se këta njerëz na u kundërvunë të gjithëve ne studentëve dhe jo vetëm mua, duke mos lejuar që të vazhdojmë rrugën tonë.
Ndaj sipas tij, nuk ka asnjë student të mirëfilltë të “Dhjetorit”, asnjë udhëheqës të lëvizjes studentore të asaj kohë që është i përfaqësuar në politikë. Por Shinasi Rama, që drejtuesit aktualë të politikës shqiptare i quan oligarkë që kontrollojnë gjithçka, nuk ndalet në qëllimin e shtetit-komb, që sipas tij është rruga për të shpëtuar shqiptarët nga lufta civile. “Në rrugën e tyre për t’u bërë të paprekshëm ato kanë shkatërruar shtetin, ekonominë, familjen, rininë dhe nuk i kanë lënë më asnjë shpresë shqiptarëve. Ky vend është në prag të luftës civile dhe ata kanë përdorur çdo element të manipulimit dhe dasisë politike, fetare, rajonale, krahinore, në bazë të pasurisë për të kontrolluar gjithçka.
Për luftën civile, Shinasi Rama mendon se mjafton një fije shkrepseje. “Mjafton një turmë njerëzish të paguar për t’i vënë flakën këtij vendi. Kjo është zgjidhja e tyre dhe ata janë të gatshëm ta bëjnë këtë gjë. Njerëzit po ndahen në komunistë e antikomunistë duke dalë e duke i kujtuar seicilit kush është armiku, kush ka vrarë këtë apo atë, dhe ata në Tiranë e kanë vënë një bunkier idiot tek Ministria e Brendshme vetëm që të vijnë ta djegin këta të tjerët. Nuk duhet të biem pre e kësaj gjëje”.
Si aktivist i Dhjetorit 90-të, Rama, Shinasiu pra, shprehet se këto komplekse që shoqërojnë shqiptarët janë mjetet që po përdor oligarkia. “Babai im ka qenë komunist, ndërsa daja im është dënuar si pjesë e një grupi armiqësor. Unë vetë nuk kam asnjë bindje politike dhe jam produkt i atij sistemi, kam studiuar në Shkollën e Bashkuar për zbulim. Kam ndërruar 4 fakultete dhe po, kam qenë i privilegjuar. Por ajo që na ka dalluar ishte bindja që është kulturë dhe edukatë e familjes që duhet t’i shërbejmë shtet-kombit shqiptar”.
Nëse lexohet libri, sipas autorit mund të kuptohet shumë mirë ajo që i pret shqiptarët pasi masat që të gjithë po i ndjejnë në libër janë përshkruar me detaje. Për t’i shpëtuar parashikimit fatkeq të librit të tij, Shinasi Rama jep edhe një alternativë. “Ka gjithmonë një alternativë dhe kjo është krijimi i një force të re politike për të marrë shtetin me forma sa më demokratike që të bëhemi vërtet si Gjermania, Franca apo Zvicra nuk është utopike”.
Por krijimin e saj ai e shikon brenda shqiptarëve. “Ju do të thoni kush do ta bëjë, ju shqiptarët e keni zgjidhjen. Ne kemi ndryshuar 4 sisteme dhe gjithmonë kemi besuar se sistemi nuk ndryshon. Ky sistem kriminal që ekziston sot është krejt i huaj për ne dhe nuk do të gjejmë paqe. Duhet të ndërtojmë shtet-kombin tonë me një sistem zgjedhor proporcional, të ndërtojmë ekonomi funksionale dhe me një drejtësi që i trajton qytetarët të barabartë para ligjit”.
Por në guximin e tij kundër sistemit, Shinasi Rama hedh idenë e kthimit të dënimit me vdekje dhe krijimit të një Gjykate Speciale me njerëz të mirëpaguar me pension të përjetshëm dhe me mundësi që të jetojnë ku të duan ata.
“Na duhet një gjykatë speciale me njerëz të emëruar e të paguar mirë që mund të ikin kudo me pension të përjetshëm. Ne duhet të vendosim dënimin me vdekje dhe të gjithë ata që abuzojnë duhet të marrin atë që meritojnë”.
Në 25 vjet studime, Shinasi Rama thotë se eksperienca i ka mësuar se nëse shqiptarët nuk ndërtojnë shtet-kombin e tyre, do të jenë gjithmonë skllevërit të dikujt dhe nuk do të kenë kurrë sovranitet. /tesheshi.com/
