Ndonëse seanca plenare e të martës në Kuvendin e Kosovës u thirr për të diskutuar për mënyrën se si vdiq Astrit Dehari në burgun e Prizrenit, ajo devijoi tërësisht duke përplasur pozitë e opozitë.
Dhe çuditërisht pjesë e seancës u bë edhe ish-Shërbimi Informativ i Kosovës (SHIK), konkretisht (mos)hetimi i kësaj organizate, duke e riaktualizuar këtë temë dhe rikthyer njëherit akuzat mes opozitës dhe LDK-së, për mosarritjen e mbledhjes së 40 nënshkrimeve që do të hetonin veprimtarinë e saj.
Për këtë çështje u përplasën mes tyre Ismet Beqiri i LDK-së dhe Rexhep Selimi i VV-së.
Ky i fundit, teksa po fliste për rastin Dehari iu kundërpërgjigj Beqirit i cili në fjalimin e tij akuzoi VV-në se po mundohet të përfitojë politikisht nga rasti në fjalë. “Po a nuk po mundohet të përfiton politikisht edhe ai kur po përmend vrasjet e zyrtarëve të LDK-së dhe sulmin ndaj ish-presidentit Rugova?”, tha Selimi.
Selimi tha se rasti i Deharit është politik, ashtu siç ishin edhe tentim-atentatet ndaj ish-presidentit të ndjerë Rugova.
Kjo bëri që të reagojë deputeti i LDK-së i cili pyeti Selimin “pse asnjëherë ai nuk e ngriti zërin për të kërkuar hetime për vrasjet e zyrtarëve të LDK-së”.
Por, vetëvendosësi u përgjigj duke thënë: “Kemi disa vite që kërkojmë nga ju që ta vendosni nënshkrimin për të debatuar dhe formuar komision për hetimin e këtyre vrasjeve. Por ju, z. Beqiri, nuk e keni vënë atë nënshkrim pasi që keni bërë koalicion qeverisës me PDK-në”.
Por Beqiri, theksoi se ai nuk është hetues dhe se nuk ka mbetur që SHIK-u të hetohet nga një nënshkrim i tij.
E ndërsa Selimi kërkoi sërish replikë, ajo nuk iu dha kryesuesi i seancës, Xhavit Haliti.
Ndërsa deputetët e lartcekur përplaseshin për hetimin e SHIK-ut, në sallë nuk gjendej ish-drejtuesi i këtij orgamizmi famëkeq të pasluftës , Kadri Veseli.
“Prokuroria mund ta zhvesh SHIK-un”
Siç dihet, deputetë të caktuar të LDK-së disa herë kanë drejtuar gishtin në drejtim të SHIK-ut dhe Veselit për vrasjet e zyrtarëve të saj pasluftës, dhe një prej më të zëshmëve është padyshim Adem Salihaj.
Ky i fundit drejpërsëdrejti bën përgjegjës SHIK-un për vrasjet e ish-bashkëpartiakëve të tij.
Ai, në një prononcim të dhënë më parë për tesheshi.com ka thënë se edhe nëse opozita do t’i mblidhte 40 nënshkrime për të hetuar SHIK-un, vështirë që do të arrihej ndonjë rezultat, kur dihet se deputetët e PDK-së dhe shumica e atyre të LDK-së ishin kundër, dhe s’do të mund të nxirrej një raport real e as që nuk do t’i merrte votat në Kuvend.
“Si do që të jetë, ky komision nuk u formua dhe nuk u bë asnjë përpjekje për hetimin e SHIK-ut, e cila, siç dihet, ishte një organizatë kriminale jashtligjore. Por, zgjidhja është që hetimin do të duhej ta bënte prokuroria, aty do të kishte shanse që të zhvishet kjo organizatë kriminale. Siç e dini, as kjo tash për tash nuk do të ndodh”, ka thënë Salihaj për tesheshi.com.
Ish-deputeti i AAK-së, Burim Ramadani është ligjvënësi i parë që kërkoj zyrtarisht hetimin e SHIK-ut, me ç’rast në mars të vitit 2011-të paraqiti në Kuvend iniciativën e themelimit të komisionit hetimor parlamentar.
Ndryshe, SHIK-u, i njohur si organizatë e afërt sidomos me Partinë Demokratike të Kosovës, shpalli përfundimin e aktiviteteve të veta më 14 qershor të vitit 2008 nga shefi i këtij shërbimi, Kadri Veseli.
Blendi Gashi – /tesheshi.com/
