Mediat pro-regjimit në Siri kanë publikuar një foto me milicët shiitë iranianë dhe libanezë duke ndaluar dhe ekzekutuar civilë, të cilët po përpiqeshin që të lëshojnë Halepin.
Në foto e cila është shpërndarë në mënyrë virale nëpër mediat sociale, janë parë ushtarë të armatosur duke qëndruar pranë njerëzve të shtrirë me fytyrën për tokë.
Një dëshmitar okular nga Helmetat e Bardha të Halepit, ka publikuar një zë të regjistruar në gjuhën arabe i cili thotë se të premten në një pikë kontrolli, milicia iraniane ka arrestuar dhe një grua shtatzënë, pasi ia kanë ekzekutuar bashkëshortin para syve të saj.
Aktivisti sirian i medias, Hadi Abdullah konfirmoi incidentin në të cilin kanë qenë të përfshirë milicitë iraniane dhe të Hezbollahut.
Sipas tij, civilët ranë në pritë nga Hezbollahu dhe milicitë iraniane në pikën e kontrollit, ku ata fillimisht i ndalën, e më pastaj filluan të qëllojnë me automatik. Ata po ashtu i dëbuan automjetet e Gjysmëhënës së Kuqe dhe të Kryqit të Kuq, duke i kërcënuar ata.
Ai pastaj tha se milicitë nxorën të gjithë burrat nga autobusët, u morën sendet e tyre, duke i detyruar më pas që t’i heqin rrobat e tyre dhe të shtrihen për tokë.
Abdullahu konfirmoi atë që tha anëtari i Helmetave të Bardha, se një nga burrat që doli përjashta bashkë me gruan e tij shtatzënë, u bëri rezistencë milicisë pasi një militant kishte ngacmuar gruan e tij, dhe më pas u ekzekutua bashkë me persona të tjerë.
Pas incidentit, gruas filloi t’i rrjedhë gjak si pasojë e tronditjes, dhe më pas u dërgua në zonat e mbajtura nga forcat e regjimit, shpjegoi Abdullahu.
Më pastaj milicët kthyen pjesën tjetër të civilëve në këmbë, për në zonat e rrethuara, shtoi ai.
Rebelët sirianë akuzuan të shtunën Iranin dhe milicitë e tij shiite për ndërprerjen e një marrëveshjeje për evakuimin e civilëve të bllokuar në pjesën e mbetur të bastionit të rebelëve në Halep. /tesheshi.com/
