Ky ishte adoleshenti që humbi jetën një ditë më parë te shkolla “Fan Noli” në Tiranë, goditur me thikë gjatë një sherri.
Mbrojtës i ekipit të paratërinjve të Dinamos, Martin Cami gëzonte një vlerësim, te ekipi dhe në shkollë.
“Nuk ka qenë asnjëherë problematik. E shanin, e rrihnin dhe ai nuk reagonte”, thotë një nxënëse e “Fan Nolit”.
Por kush ishte ai që e qëlloi Martin, që siç shihet dhe në foto, ka një portret që përcjell mirësi e paqe?
Emri nuk i është publikuar akoma, por fytyra po. Madje është fjala për një pozim pak pasi ka kryer krimin e tmerrshëm, duke marrë një jetë.
Është A2 CNN që ka marrë foton e autorit në Snapchat, ku ai vetëpozohet në mënyrë triumfale, pra pak pasi ëhstë kryer krimi, ku një krah e ka të plagosur, sigurisht jo nga viktima. E me tjetrin tregon sfidueshëm grushtin.
Dhe, duke gjykuar së paku nga fotot, pamjet e autorit e viktimës, qartësohet deri diku se për ç’lloj krimi është fjala, pa element aksidentalë.
Ka reaguar së fundi dhe hoxha që do kryejë ritin fetar në përcjelljen mortore të viktimës për në jetë tjetër.
Lulzim Plloçi, imam në Tiranë, shkruan:
“Xheneti qoftë vendprehja jote Martin.
Kur dëgjova për vdekjen tënde u trishtova. Kur mësova se ishim nga e njëjta krahinë u pikëllova.
Kur më kërkuan të shërbej në varrimin tënd sot, zemrën dhe syrin e kaploi loti por disi u ngushëllova.
Sepse do të jem aty pranë teje, pranë familjes tënde dhe me lutjet e bashkëmoshatarëve, prindërve e të gjithë shqiptarëve që Zoti të të mëshirojë e familjes tënde tu japë durim të mirë e lutje të pranuara”. /tesheshi.com/
