Udhëheqësi i Koresë së Veriut Kim Jong Un mori një makinë nga presidenti rus Vladimir Putin si dhuratë “për përdorim personal”, raportuan mediat zyrtare të martën më 20 shkurt, gjë që mund të jetë një shkelje e sanksioneve të OKB-së që Moska ka miratuar gjithashtu kundër Phenianit.
Të dy vendet kanë krijuar lidhje më të ngushta që kur Kim dhe Putin u takuan në shtator dhe u zotuan të nxisin shkëmbimet në të gjitha fushat ndërsa izolimi i tyre ndërkombëtar thellohet mbi luftën e Rusisë në Ukrainë dhe zhvillimin e armëve bërthamore të Koresë së Veriut.
Makina e prodhuar nga Rusia iu dorëzua ndihmësve të Kim më 18 shkurt, raportoi agjencia zyrtare e lajmeve e Koresë së Veriut KCNA.
Motra e Kim “përcolli me dashamirësi palës ruse mirënjohjen e Kim Jong Un për Putinin, duke thënë se dhurata shërben si një demonstrim i qartë i marrëdhënieve të veçanta private të liderëve të lartë”, raportoi KCNA.
Ministria e Punëve të Jashtme të Koresë së Jugut njoftoi se po monitoron nga afër bashkëpunimin mes Rusisë dhe Koresë së Veriut, ndërsa u bëri thirrje të dyja vendeve që t’i përmbahen rezolutës së Këshillit të Sigurimit të OKB-së.
“Sanksionet e Këshillit të Sigurisë ndalojnë furnizimin, shitjen ose transferimin e drejtpërdrejtë ose të tërthortë në Korenë e Veriut të të gjitha automjeteve të transportit të kategorizuara ndërkombëtarisht si kodi HS 86 deri në 89, pavarësisht nga origjina e tyre, duke përfshirë makinat luksoze,” tha zëdhënësi i Ministrisë së Jashtme koreoanojugore Lim Soo-suk.
Zëdhënësi i Kremlinit Dmitry Peskov i tha agjencisë shtetërore ruse të lajmeve RIA se udhëheqësi korean mori një makinë Aurus.
Sipas faqes së internetit të prodhuesit të automjeteve, makina është sedani i parë i madh luksoz i Rusisë. Si e tillë është gjithashtu edhe vetura presidenciale e Putinit.
Në shtator, gjatë një vizite në stacionin hapësinor të Rusisë në Lindjen e Largët, Kim inspektoi limuzinën Aurus Senat dhe u ftua në sediljen e pasme nga udhëheqësi rus.
Vetë Kim shkoi në stacion me një limuzinë Maybach të sjellë me një tren special nga Pheniani.
Kim besohet të jetë një entuziast i zjarrtë i makinave dhe ka një koleksion të madh të automjeteve të huaja luksoze, të cilat besohet se janë kontrabanduar.
Maybach dhe të tjerët ku ai është parë, duke përfshirë disa sedan Mercedes, një Rolls-Royce Phantom dhe një automjet sportiv Lexus, janë mallra luksoze të ndaluara të eksportohen në Korenë e Veriut me rezolutat e Këshillit të Sigurimit të OKB-së.
Koreja e Veriut besohet se po furnizon Rusinë me artileri dhe raketa balistike për luftën e saj kundër Ukrainës.
Kremlini as nuk e ka mohuar dhe as ka konfirmuar se përdor armë të prodhuara nga Koreja e Veriut. Por kjo e fundit hedh poshtë akuzat për furnizim me armë Rusisë, gjë që do të ishte gjithashtu një shkelje e sanksioneve të OKB-së. /tesheshi.com/
