Nga Bashkim Kastrati
Edhe përkundër faktit se në Kosovë ka një numër të madh të të varfërve, të cilët jetojnë në kushte shumë të vështira ekonomike dhe mezi e sigurojnë mbijetesën, në anën tjetër Qeveria e Kosovës shpenzon para të shumta për udhëtime zyrtare, dreka e darka, mbushje të telefonit, vetura derivate etj.
Vitin e kaluar Qeveria kishte shpenzuar 184.8 milionë euro për mallra dhe shërbime. Në këtë shumë përfshihen shpenzimet e udhëtimit, derivate, shërbimet e telefonit, pajisjet me mobile dhe të tjera.
Ndërkaq, sipas raportit të Ministrisë së Financave, del se në vitin 2015, Qeveria ka shpenzuar 10 milionë e 749 mijë euro për udhëtime, ndërsa për derivate kanë shpenzuar 19.6 milionë euro. Pajisje për mobilie dhe pajisje janë shpenzuar 5.7 milionë euro. Kurse, për objektet që i ka me qira ka shpenzuar 7.6 milionë euro.
“Mallrat dhe shërbimet e paguara gjatë vitit 2015 janë në shumën prej 184,828,000 euro. Kjo ka përfshirë 181,292,000 euro nga fondi i përgjithshëm dhe 3,535,000 euro nga grantet e përcaktuara të donatorëve. Në këtë shpalosje nuk janë të përfshira shpenzimet nga pagesat direkte të Bankës Botërore, shpenzimet e udhëtimit 10,749.000 milionë euro. Derivate dhe lëndë djegëse 19,628. milionë euro”, thuhet në raportin e shpenzimeve të Qeverisë për vitin 2015.
Po sipas këtij raporti, shpenzimet kapitale gjatë vitit 2015 ishin në shumë prej 407,926,000 euro, duke përfshirë 403,851,000 euro nga fondi i përgjithshëm dhe 4,075,000 euro nga grantet e përcaktuara të donatorëve.
Tek investimet duket që Qeveria as vitin e kaluar nuk ka kursyer, ajo ka shpenzuar 11,516.000 automjete transporti, ndërsa, për ndërtimin e rrugëve ka shpenzuar 237,605.000 euro.
Shpenzojnë pa hezitim paratë e taksapaguesve të varfër
Lulzim Beqiri, magjistër i ekonomisë ka thënë për tesheshi.com se shpenzimet qeveritare janë enorme për situatën ekonomike që ndodhet Republika e Kosovës, mbi 45 për qind e popullsisë janë të papunë, me një varfëri ekstreme, mungesë të perspektives për jetë, dhe qeveritarët tanë kanë guximin t’i harxhojnë këta miliona është pak jo e kapshme për një ekonomist.
AI thotë se Kosova nuk shquhet se ka arritur ndonjë progres në fushën e diplomacisë për ti harxhuar 11 milionë euro, mund ti përmendim vetëm dështimet në këtë fushë, por suksese nuk kanë sjellë këto 11 milionë euro, normal përveç kënaqësisë që kanë pas këta udhëheqës.
“Sa i përket veturave zyrtare është jo serioze kjo qa bëjnë institucionet e Kosovës. Kosova nuk e ka luksin e blerjes së makinave luksoze përderisa një Kryeministër ose Ministër perëndimor udhëton me tren ose autobus, kush jemi ne të harxhojmë miliona euro për makina luksoze ? thjeshtë për mendjemadhësi”, thotë Beqiri.
Ai thotë se gjatë vitit 2015 deputetët e Kuvendit të Kosovës shpenzuan për shërbime të telekomunikimit mbi 90 mijë euro, ndërsa vetëm për telefon mobil për të zgjedhurit e popullit, sipas raportit të shpenzimeve, u paguan 86 mijë euro.
Beqiri thotë se është e domosdoshme që të ulen këto shpenzime marramendëse, populli është para një sfide serioze të protestave masive dhe mos bindjes qytetare për këta keqmenaxhues së parasë publike.
“Dikush duhet t’i ndalë këta, përndryshe vetë nuk dine të ndalen. Ne e dimë që shumë vende në tranzicion siç është Kosova kanë kaluar po të njëjtat probleme, por kujtoj është koha që të mbushen burgjet me këta matrapazë dhe për këtë duhet marr shembulli i Kroacisë e cila ka bërë reformën më të madhe të drejtësisë duke burgos të gjithë profiterët të luftës dhe të pas luftës”, u shpreh Beqiri.
Këto shpenzime ndodhin vazhdimisht, ndërsa qytetarët edhe në aspektin e shërbimeve nuk i kanë as gjerat elementare të siguruara nga institucionet përkatëse. Shembull në institucionet shëndetësore publike, ka mungesë të produkteve elementare medicinale dhe qytetarët duhet që t’i blejnë barnat vetë, apo një incizim ta bëjnë në sektorin privat. /tesheshi.com/
