ASK publikon rezultatet e anketës së buxhetit të ekonomive familjare 2014
Agjencia e Statistikave të Kosovës (ASK) ka publikuar Rezultatet e Anketës së Buxhetit të Ekonomive Familjare (ABEF) për vitin 2014. Ky raport ofron të dhëna për konsumin, shpenzimet dhe të ardhurat e ekonomive familjare, etj.
Nga rezultatet e dala nga ky publikim, konsumi i përgjithshëm në Kosovë në vitin 2014 ishte 2,471 milionë euro, ndërsa për ekonomi familjare 7,611 euro, dhe për kokë banori ishte 1,386 euro. Krahasuar me vitin 2013, konsumi i përgjithshëm në Kosovë ka pasur një rritje prej 3,7%, ndërsa konsumi për kokë banori ka pasur rënie për 1,1 % dhe konsumit për ekonomi familjare ka pasur rënie për 0,18 %.
Pjesën më të madhe të konsumit ekonomitë familjare në Kosovë e kanë shpenzuar për ushqim me 44 %, në kuadër të konsumit të përgjithshëm, dhe për banim me 28 % në kuadër të konsumit të përgjithshëm, thuhet në raportin e ASK-së.
Po ashtu një prej burimeve më të rëndësishëm i të hyrave të ekonomive familjare janë rrogat nga sektori privat dhe ai publik, pastaj të hyrat nga biznesi vetanak, si dhe paratë e dërguara nga jashtë. Ndërsa, te të hyrat individuale, pjesën më të madhe të të hyrave e përbëjnë rrogat nga punësimi i rregullt, që përfaqësojnë 51%, kurse burimi i dytë janë të hyrat nga bizneset me 12 %, përfundon raporti i ASK-së./tesheshi.com/
