Bashkimi Evropian deri më tani ka ngrirë asetet e oligarkëve rusë, individëve të tjerë dhe kompanive me vlerë 13.8 miliardë euro, tha të martën një zyrtar i lartë evropian.
Pjesa më e madhe u kap në pesë nga 27 anëtarët e Unionit, tha zyrtari dhe u bëri thirrje anëtarëve të tjerë të bëjnë më shumë.
Aktualisht janë 98 kompani dhe organizata dhe pothuajse 1600 individë në listën e zezë të BE-së për shkak të pushtimit rus të Ukrainës, raporton Reuters.
“Deri më tani ne kemi sekuestruar pasuri të oligarkëve dhe subjekteve të tjera me vlerë 13.8 miliardë euro, kjo është shumë”, tha Komisioneri Evropian për Drejtësinë Didier Reynders.
“Megjithatë, në pjesën më të madhe, më shumë se 12 miliardë euro janë ngrirë në pesë shtete anëtare dhe ne duhet të vazhdojmë të bindim të tjerët të bëjnë të njëjtën gjë,” u tha ai gazetarëve që mbërrinin në një takim të ministrave të drejtësisë të BE-së në Pragë.
Reynders nuk specifikoi se cilët ishin pesë anëtarët.
Sipas tij, pas verës pritet një marrëveshje përfundimtare politike për instrumentet e reja ligjore që duhet të parandalojnë anashkalimin e sanksioneve në nivel të gjithë Unionit, gjë që tani nuk është kështu.
Politika, e cila synon të parandalojë evazionin e sanksioneve duke transferuar pasuri te anëtarët e pasanksionuar të familjes, mund të hyjë në fuqi në vjeshtë.
Dhe mëgjithë këto tregues ndëshkimorë, në realitet Rusia duket se nuk është dëmtuar aq sa për ta vënë në diskutim luftën. Madje kjo është dhe pikëpyetja e madhe e sot e luftës ekonomike të Perëndimit ndaj Rusisë, nëse është e efektshme apo jo? Për Moskën, aspak. Madje Kremlini beson se po e fiton këtë luftë, duke tentuar ta fusë Perëndimin në kolaps energjitik. Deri tani po ia del. /tesheshi.com/
