Ekonomia në Shqipëri po mbahet nga investimet e huaja dhe nga emigrantët. Shifrat më të fundit që vijnë nga banka e Shqipërisë flasin për rritje të investimeve të huaja direkte në tremujorin e dytë të këtij viti sikundër edhe për rritje të dërgesave të emigrantëve.
Kështu, investimet e huaja direkte u rritën me 36 për qind, duke kapur shifrën e 198 milionë euro. Në total për gjashtëmujorin, investimet e huaja janë rritur me 31.5 për qind krahasuar me gjysmën e parë të vitit të kaluar, ose me një vlerë prej 115 milionë euro më shumë.
Banka qendrore saktëson se edhe dërgesat e emigrantëve shënuan rritje dyshifrore me 17.6 përqind, duke shkuar në 162.5 milionë euro nga 138.1 milionë, një vit më parë.
Dërgesat nuk janë prekur nga kriza greke dhe shënojnë rritjen e parë pas disa vitesh në rënie. /tesheshi.com/
