Më shumë se 10 mijë fëmijë që kanë mbërritur në Europë me fluksin e refugjatëve rezultojnë të zhdukur, përgjatë dy viteve të fundit. Shërbimet sekrete të policisë së Bashkimit Europian thonë se mijërat e fëmijëve, të pashoqëruar dhe pa ndihmë, janë zhdukur pasi janë regjistruar nga autoritetet e shteteve të ndryshme, gjë që lë të hapur mundësinë që numri të jetë më i madh për shkak se mund të ketë edhe fëmijë që nuk janë regjistruar.
Europoli paralajmëron se fëmijët dhe të rinjtë e moshës së njomë, mund të zhfrytëzohen për prostitucion e aktivitetete të tjera skllavëruese nga bandat kriminale.
“Save the Children” thotë se 26 mijë fëmijë refugjatë mbërritën në Europë vetëm vitin e kaluar, të pashoqëruar nga asnjë pjesëtar i familjes.
“Nuk po flasim për të gjithë, tha shefi i Europolit, jo të gjithë ata mund të kenë përfunduar të shfrytëzuar, pasi një pjesë mund të jenë bashkuar me familjet. “Puna është se ne nuk e dimë se ku janë, çfarë bëjnë dhe me kë janë”, shtoi ai.
Që në maj të vitit të kaluar, zyrtarët në Itali ngritën alarmin për pothuajse 5 mijë fëmijë të zhdukur nga qendrat e pritjes së azilkërkuesve.
Në tetor, autoritetet në Trelleborg, në jug të Suedisë thanë se rreth 1 mijë fëmijë të pashoqëruar dhe të rinj refugjatë që kishin mbërritur në qytet, ishin zhdukur.
Duke konfirmuar numrin e përgjithshëm të të miturve të zhdukur, një zëdhënës i Europolit tha se një pjesë e madhe e tyre rezultojnë të tillë që pas zbritjes në Greqi. Vendi është pika e parë e hyrjes për më shumë se 1 milionë refugjatë që mbërritën me varka në Europë vitin e kaluar, dhe autoritetet greke janë kritikuar se kanë dështuar në regjistrimin dhe kontrollin e të sapombërriturve.
Sipas Europolit, bandat kriminale të përfshira në trafikun e qënieve njerëzore dihen se tashmë kanë vendosur në shënjestër fëmijët dhe të rinjtë e pashoqëruar për qëllime kriminale nga më të ndryshmet.
Zëdhënësi i IOM, agjencisë për migracionin, Leonard Doyle tha se shifra e 10 mijë fëmijëve të zhdukur është tronditëse, por nuk vjen si surprizë.
“Le të shpresojmë tashmë se BE do të përdorë burimet e veta për t’i gjetur këta fëmijë, për t’i ndihmuar dhe bashkuar me familjet e tyre”, thotë ai.
Me mijëra fëmijë, duke e ndjerë veten të pasigurtë dhe të pambrojtur në qendrat e pritjes së refugjatëve në Itali janë zhdukur, duke u larguar në rrugë. Ata nuk kanë pasur mënyrë tjetër për t’u ushqyer, përveçse duke bërë atë që u thonë bandat e krimit për të mbijetuar. /tesheshi.com/
