Çdo tre ditë përgjatë një viti, 1 mjek largohet nga Shqipëria. Referuar shifrave të Urdhërit të Mjekut, rezulton se 125 mjekë kanë tërhequr dokumentin që u nevojitet për tu rregjistrur në urdhrat profesionalë jashtë vendit, një shifër kjo e konsiderueshme për një vend si Shqipëria që vuan mungesën e mjekëve specialist në shumë nga spitalet rajonale të vendit.
“Fatkeqësisht edhe këtë vit fenomeni i largimit të mjekëve po vazhdon me të njëtin ritëm si një vit më parë.
Edhe këtë vit janë marrë deri më tani 125 çertifikata të sjelljes së mirë, një dokument që kërkohet kudo për mjekët që shkojnë jashtë për të punuar. Vitin e kaluar ne e mbyllëm më 145, por këtë vit deri më tani janë 125 kërkesa”, tha për TVSH, presidenti i Urdhrit të Mjekut Prof.Dr. Fatmir Brahimaj.
Shkaqet, sipas Brahimajt, mbeten kushte më të mira pune dhe vlerësimi si dhe siguri më të lartë mbrojtje nga legjislacionet e vendeve perendimore.
“ Ata shkojnë për një jetë më të mirë, për një vlerësim më të mirë moral dhe material, për mundësira më të mira të rritjes në karierë. Në vendet ku shkojnë pretendojnë, dhe realisht gjejnë, një teknologji më të avancuar dhe kanë më shumë mundësi të bëjnë një mjekësi bashkëkohore.
Ndihen më të sigurtë në lidhje me mbrojtjen nga legjislacioni. Kini parasysh krizën e besimit që vuajnë bluzat e bardha në vendin tonë apo edhe nevoja që ekziston për ndryshime ligjore”, tha ai. /tesheshi.com/
