Numri i viktimave mbi 10 mijë për katër vjet radhazi, përveç një rënieje të lehtë në vitin 2016, tregojnë ashtu si thotë edhe OKB “për vuajtje të pabesueshme njerëzore”.
Më shumë se 10 mijë civilë u vranë apo u plagosën në sulme të dhunshme në luftën në Afganistan, vitin e kaluar. Shifrat vijnë nga raporti më i fundit i misionit të OKB-së në këtë vend, që thotë se numri ka rënë me 9 për qind në vitin 2017, krahasimisht me një vit më parë.
“Statistikat rrënqethëse në këtë raport mundësojnë të dhëna të besueshme për ndikimin e luftës, por vetëm shifrat nuk mund të tregojnë vuajtjet e parrëfyeshme që u janë shkaktuar njerëzve të thjeshtë”, tha shefja e misionit të OKB-së në Afganistan, Tadamichi Yamamoto.
Presidenti amerikan, Donald Trump paraqiti një strategji më agresive në Afganistan gushtin e kaluar, përfshirë edhe rritje të sulmeve ajrore. Militantët janë hakmarrë me sulme në kryeqytetin Kabul, në javët e fundit, duke vrarë rreth 150 persona e duke plagosur shumë të tjerë.
Bilanci total i civilëve vitin e kaluar ishte 3,438 të vrarë dhe 7,015 të plagosur, sipas OKB-së: 27 për qind e vdekjeve ishin në sulme drejtuar ndaj civilëve.
“Kur shohim civilë që shënjestrohen qëllimisht, themi edhe sa kohë mund të zgjasë kjo”, tha Yamamoto.
Zeid Ra’ad Al Hussein, komisioneri i lartë për të drejtat e njeriut i OKB-së, apeloi që përgjegjësit të dalin para Drejtësisë. “Populli i Afganistanit, vit pas viti, jeton në pasiguri dhe frikë, ndërsa ata që e shkaktojnë këtë, që u japin fund jetëve të civilëve dhe ndëshkojnë të pafajshëm, ia dalin të padënuar”, tha ai.
OKB raportoi edhe rritje të numrit të viktimave mes grave dhe fëmijëve. Shifrat thonë se mes fëmijëve janë 3,179 të prekur (861 të vrarë dhe 2,318 të plagosur) – në një rënie me 10 për qind nga viti 2016.
Përveç viktimave, pothuajse katër dekada konflikti në Afganistan kanë sjellë breza të tërë refugjatësh që nuk janë arsimuar dhe jeta e të cilëve është ndërprerë në mes. Vendi përballet me humbjen e një brezi të popullsisë, që ka vuajtur shumë edhe kaq.
Më shumë se 28 mijë civilë janë vrarë dhe më shumë se 52 mijë të tjerë janë plagosur në Afganistan që prej vitit 2009 kur OKB nisi dokumentimin e viktimave.
Përgatiti: Juli Prifti – /tesheshi.com/
